Ўзбекистон, Тошкент - Batafsil.uz. Ўзбекистон Республикаси Президенти Шавкат Мирзиёев Хорижий инвесторлар кенгашининг навбатдаги ялпи мажлисида иштирок этиб, мамлакатда инвестиция муҳитини янада яхшилаш бўйича амалга оширилаётган ислоҳотлар ҳақида сўз юритди.
Давлат раҳбари сўнгги йилларда Кенгаш оддий маслаҳат майдонидан амалий ислоҳотлар платформасига айланганини таъкидлаган. Бугунги кунда Кенгаш мустақил уюшма мақомига эга бўлиб, унинг таркибидаги компаниялар сони 54 тадан 85 тага етган. Улар иқтисодиётнинг 23 та соҳасида фаолият юритмоқда.
Президентнинг қайд этишича, ўтган йилги йиғилишда билдирилган 21 та ташаббус бўйича аниқ қарорлар қабул қилинган. Хусусан, инвесторлар таклифлари асосида Солиқ кодексига ўзгартишлар киритилган, компаниялар ўртасидаги ички қарз битимлари молиявий назоратдан чиқарилган, асосий воситаларни тезлаштирилган тартибда амортизация қилиш ҳуқуқи берилган ҳамда халқаро стандартлар бўйича ҳисобот юритувчи хорижий компаниялар учун қатор мажбурий талаблар бекор қилинган.
Шунингдек, "Муқобил инвестиция жамғармалари тўғрисида"ги қонун лойиҳаси ишлаб чиқилган, масъулиятли бизнес юритиш стандартларини жорий этиш ва техник регламентларни халқаро меъёрларга мослаштириш бўйича дастур тайёрланган.
Президент мамлакатнинг халқаро инвестиция соҳасидаги мажбуриятлари кенгайиб бораётганини ҳам таъкидлади. Яқинда Ўзбекистон Иқтисодий ҳамкорлик ва тараққиёт ташкилотининг Халқаро инвестициялар ва кўп миллатли корхоналар тўғрисидаги декларациясига қўшилишини эълон қилган. Шунинг мантиқий давоми сифатида Тошкент халқаро молия маркази тўғрисидаги Конституциявий қонун қабул қилиниши кутилмоқда.
Йиғилишга тайёргарлик жараёнида хорижий инвесторлардан 120 та янги таклиф ва ташаббус келиб тушгани маълум қилинган. Улар инвестиция муҳити, солиқ тизими, кадастр, энергетика, молия ва банк соҳаси, корпоратив бошқарув, сунъий интеллект ҳамда рақамли иқтисодиёт каби еттита устувор йўналиш бўйича умумлаштирилган.
Давлат раҳбари валюта операцияларини соддалаштириш, исломий суғурта ва "яшил" кредитлар каби янги молиявий механизмларни жорий этиш, шунингдек, корхоналарда экологик ва ижтимоий масъулият тамойилларини кенг татбиқ этиш масалалари долзарб аҳамиятга эга эканини таъкидлаган.
Мажлис якунида Президент барча таклиф ва муаммолар асосида ягона йўл харитаси ишлаб чиқилишини маълум қилди. Унинг ижроси устидан доимий назорат ўрнатилиб, ҳар чоракда давлат раҳбарига ҳисобот тақдим этилади.
Шавкат Мирзиёев хорижий инвесторларга мурожаат қилиб, уларнинг ташаббуслари Янги Ўзбекистонда очиқ, барқарор ва рақобатбардош иқтисодиётни шакллантиришга хизмат қилаётганини таъкидлаб, самарали ҳамкорлик учун миннатдорлик билдирган.
Изоҳлар мавжуд емас