Ўзбекистон, Тошкент - Batafsil.uz. АҚШ Давлат котиби Марко Рубио Ўзбекистонга ташрифи доирасида миллиардлаб долларлик келишувлар имзоланиши кутилаётганини маълум қилди. У Саида Мирзиёева ҳамроҳлигида Самарқанддаги Регистон майдонига ташриф буюриб, журналистлар билан суҳбатлашди. Рубионинг айтишича, Самарқандга қарийб 300 та Америка компанияси вакиллари келган.
АҚШ Давлат котиби Самарқанднинг тарихий аҳамиятига тўхталиб, шаҳар асрлар давомида халқаро савдо ва маданий алоқаларнинг муҳим чорраҳаларидан бири бўлганини таъкидлаган. У Ўзбекистон томонининг самимий қабул ва меҳмондўстлиги учун миннатдорлик билдирган.
Рубио АҚШ Ўзбекистон ва Марказий Осиёнинг бошқа давлатлари билан савдо-иқтисодий алоқаларни кенгайтиришдан манфаатдор эканини қайд этган. Ташриф доирасида америкалик ишбилармонлар иштирокида учрашувлар ва бизнес мулоқотлари ўтказилиши режалаштирилган.
Кутилаётган миллиардлаб долларлик келишувлар икки мамлакат ўртасидаги инвестициявий ҳамкорликни кенгайтириш учун муҳим бўлиши мумкин. Бироқ ҳозирча келишувларнинг аниқ қиймати, қайси соҳаларни қамраб олиши ва уларнинг қанчаси имзолангани ҳақида батафсил маълумот берилмаган.
Изоҳлар мавжуд емас