Ўзбекистон, Тошкент - Batafsil.uz. Президент Шавкат Мирзиёев инвесторларни "хорижлик" ва "маҳаллий" деб ажратмаслик кераклигини таъкидлаб, Ўзбекистонга сармоя киритиб, янги технологиялар олиб келаётган ва иш ўринлари яратаётган тадбиркорлар мамлакат тараққиётига ҳисса қўшишини айтди. Давлат раҳбари бу ёндашувни "ЎЗ" фалсафаси деб атаб, уни "Ўзбекистон, ўзгариш, ўзлик ва масъулият" тушунчалари билан изоҳлади.
"Капиталнинг, илғор ғоянинг ва ҳалол меҳнатнинг миллати йўқ!" — деди Президент.
Унинг таъкидлашича, Янги Тошкент ёки Ширин шаҳри қурилишида иштирок этаётган, мамлакатга сармоя киритаётган ҳар қандай инвестор келиб чиқишидан қатъи назар, умумий тараққиётга ҳисса қўшади.
"Кимки Янги Тошкентни ёки Ширинни биз билан бирга қурса, демак, у тўлақонли ўзимизники!" — деди давлат раҳбари.
Шунингдек, Президент инвесторларнинг мулки ва бизнеси қонун, давлат ҳамда шахсан унинг қатъий ҳимоясида бўлишини таъкидлади.
Мулоқот давомида тадбиркорлар ва инвесторлар билдирган таклифлар эътиборсиз қолдирилмаслиги, улар асосида яқин кунларда тегишли қарорлар қабул қилиниши айтилди. Шавкат Мирзиёев бир ойдан сўнг Янги Тошкентга яна ташриф буюриб, берилган топшириқлар ижросини кўриб чиқишини маълум қилди.
Учрашув якунида давлат раҳбари инвесторлар ва тадбиркорларни "Ўз ғоянг! Ўз сармоянг! Ўз келажагинг! Янги Ўзбекистон, Янги Тошкент — ўзимизники!" шиори атрофида бирлашишга чақирди. У Янги Тошкентда мамлакат учун муҳим бўлган кўплаб ўзига хос лойиҳалар амалга оширилишига ишонч билдирди.
Изоҳлар мавжуд емас