Ўзбекистон, Тошкент - Batafsil.uz. Қозоғистон ва Ўзбекистон темир йўлдаги коллапсни ҳал қилишга ҳаракат қилмоқда, бу ерда 11 мингга яқин юкланган вагонлар туриб қолган, уларнинг ярмидан кўпи дон билан тўлдирилган. Буларнинг барчаси экспорт мавсуми қизиган пайтда содир бўлиб, аграр бозор учун хавф туғдиради. Бу ҳақда мухбиримиз хабар бермоқда.
Қозоғистоннинг "Tengrinews" портали хабарига кўра, Қозоғистон жанубидаги чегара темир йўл станцияларида тўхташлар билан боғлиқ кескин вазият юзага келган. 6 декабрь ҳолатига кўра, асосий кескинлик нуқтаси Шенгелди, Йилға ва Дарбаза бекатлари бўлиб, уларда йўллар кутиб турган поездлар билан тўлиқ банд. Айрим эшелонлар олти кунгача туриб қолади, бу эса етказиб беришнинг меъёрий муддатларидан сезиларли даражада ошиб кетади.
"Қозоғистон темир йўли" вакиллари тирбандликни Ўзбекистондаги "Сариагаш" бекатининг имкониятлари чегарасида ишлаётгани билан боғламоқда. Муаммони тезкор ҳал қилиш учун Қозоғистон томони таркибларни ташишда ёрдам бериш учун қўшимча локомотивларни юбориб, Сариагаш бекатида 24 соатлик иш режими жорий этилди. Бироқ, мутахассисларнинг фикрича, инфратузилманинг ўтказувчанлик қобилиятини тизимли равишда оширмасдан туриб, бундай инқирозлар такрорланаверади.
7 декабрь, якшанба куни Ўзбекистон Транспорт вазирлиги икки давлат темир йўл маъмуриятлари ўртасида музокаралар бўлиб ўтганини маълум қилди. Вазирлик маълумотларига кўра, улар Ўзбекистон транспорт вазири Илҳом Маҳкамов иштирокида Сариагаш бекатида ўтган.
"Музокаралар чоғида томонлар юк ташиш динамикаси, инфратузилмани модернизация қилиш, шунингдек, транзит йўналишларини кенгайтириш истиқболларини муҳокама қилдилар. Мавжуд йўналишларнинг ўтказувчанлик қобилиятини ошириш ва логистика жараёнларини мақбуллаштириш учун рақамли ечимларни жорий этиш масалаларига алоҳида эътибор қаратилди", - дейилади хабарда.
"Kazinform" халқаро ахборот агентлиги ҳам 8 декабрь куни икки давлат делегациялари учрашуви ҳақида хабар берди. Аниқлик киритилишича, томонлар дон юкларини " Сариагаш" давлатлараро туташув пункти орқали Марказий Осиё ва Афғонистонга йўналишда узлуксиз ташиш бўйича қўшма қарорларни келишиб олган.
Шунингдек, делегациялар поездлар алмашинувини кунига 35 жуфтгача ошириш ва кунига камида 10 та дон ва 5 та озиқ-овқат маҳсулотлари поездини қабул қилишни таъминлашга келишиб олган. Юк тушириш терминаллари дам олиш ва байрам кунлари 24 соат давомида ишлаши бўйича келишувга эришилган.
"Дон юкларини ортиш ва тушириш балансини амалга ошириш мақсадида томонлар Ўзбекистондаги дон юкларини қабул қилувчиларнинг бўш қувватларини, шунингдек, бўш вагонларнинг келишилган айланмасини ҳисобга олган ҳолда экспорт ташишларини режалаштиришга келишиб олдилар", - дейилади хабарда.
Статистик маълумотларга кўра, жорий йилнинг 11 ойи давомида Қозоғистон ва Ўзбекистон ўртасидаги темир йўл ташувлари ҳажми 16 фоизга ўсиб, 28,5 миллион тоннани ташкил ыилган. Дон ташиш ҳажми 32 фоизга ошиб, 5,6 миллион тоннага етган.
Изоҳлар мавжуд емас