Ўзбекистон, Тошкент - Batafsil.uz. Food City Tashkent бозори маъмурияти томонидан муз маҳсулотлари олиб кириш учун тадбиркордан талаб қилинаётган асоссиз тўловлар Рақобат қўмитасининг аралашуви билан бекор қилинди. Аниқланишича, бозорга муз олиб кириш учун кунлик йиғим миқдори бир неча баробар оширилган бўлган.
Қўмита аниқлашича, муз олиб кириш учун кунлик тўлов 737 минг сўмга оширилган. Мазкур ҳолат юзасидан идора муз маҳсулотлари савдоси билан шуғулланувчи тадбиркор мурожаат қилган. Мурожаат муаллифи бозор маъмурияти сунъий тўсиқлар яратиш орқали уни фаолиятини тугатишга ва бозордан сиқиб чиқаришга уринаётганини баён этган.
Қўмита томонидан ўтказилган ўрганишлар ва бозор маъмуриятига юборилган расмий сўровдан сўнг, томонлар иштирокида музокара ташкил этилган. Мулоқот натижасида Food City Tashkent компанияси ва тадбиркор ўртасида келишувга эришилиб, муаммо ижобий ҳал этилди ва оширилган тўловлар бекор қилинган.
Рақобат қўмитаси устун музокара кучига эга бўлган барча хўжалик юритувчи субъектларни қонунчиликка риоя қилишга чақирган. "Рақобат тўғрисида"ги Қонуннинг 14-моддасига кўра, битим шартлари ва нархларни бир томонлама белгилаш имкониятини суиистеъмол қилиш молиявий санкциялар қўлланилишига сабаб бўлади.
Изоҳлар мавжуд емас