Ўзбекистон, Тошкент - Batafsil.uz. Ўзбекистонда 1 фоизлик солиқ кешбеки тизимидан босқичма-босқич воз кечиш ва унинг ўрнига чек олганлар ўртасида автомобиль ҳамда бошқа қимматбаҳо совғалар ўйналадиган давлат лотереяларини жорий этиш таклиф қилинмоқда.
Иқтисодиёт ва молия вазирлиги ҳузуридаги Фискал таҳлиллар институти маълум
қилишича, 2022 йилда 1 фоизлик кешбекни молиялаштириш учун 820 миллиард сўм сарфланган бўлса, 2026 йилда бу кўрсаткич 1,8 триллион сўмга етиши прогноз қилинмоқда.
Экспертлар фикрича, оммавий кешбек ўрнига чекларни рағбатлантирувчи давлат лотереялари жорий этилса, бюджет харажатларини қарийб 20 бараваргача қисқартириш мумкин.
Таҳлилда қайд этилишича, сунъий интеллект, Big Data, онлайн назорат-касса машиналари ва электрон ҳисобварақ-фактуралар кенг жорий этилгани сабабли солиқ назоратини хавфга асосланган ёндашувлар орқали амалга ошириш имкониятлари кенгайган. Шу боис, мавжуд кешбек тизимини замонавий рақамли солиқ маъмурчилиги талабларига мос равишда қайта кўриб чиқиш таклиф этилган.
Аввалроқ Солиқ қўмитаси апрель ойи учун 102,5 млрд сўмлик ижтимоий кэшбек тўловларини сохта чеклардан фойдаланганликда гумонланиб, вақтинча тўхтатганди.
Изоҳлар мавжуд емас