Ўзбекистон, Тошкент - Batafsil.uz. "Миллий тикланиш" демократик партияси Марказий кенгаши раиси, депутат Алишер Қодиров Ўзбекистонда ноқонуний қурилишларга қарши жарималарни ошириш зарурлигини таъкидлади. Унинг сўзларига кўра, шаҳарларда рухсатсиз ва лойиҳадан четга чиқиб қурилаётган бинолар аҳоли хавфсизлигига жиддий таҳдид солиши мумкин.
"Халқимиз учун уй-жой жуда муҳим, шаҳар экологияси ҳам зарур масала, лекин хавфсизлик энг асосийси", — деган
Қодиров.
Депутатнинг таъкидлашича, Ўзбекистонда ҳужжатлари қурилиш жараёнида расмийлаштириладиган 500 дан ортиқ бино ва қарийб 38 мингта хонадон мавжуд. У бундай объектларнинг белгиланган талабларга қай даражада жавоб беришини савол остига қўйган.
"Нега тўғри бўлса, рухсатсиз қурилган? Нега одамларни гаровга олгандек уйга жойлаштириб олиб, кейин масъул идоралардан рухсат сўралади?" — деган у.
Ноқонуний қурилишлар учун жарималарни жиддий ошириш тўғрисидаги қонун лойиҳаси биринчи ўқишда кескин муҳокамалардан сўнг қабул қилинган. Унинг айтишича, депутатлар жарималарнинг оширилиши тадбиркорлар учун яратилган шароитларга салбий таъсир кўрсатиши мумкинлиги ҳақида хавотир билдирган.
Бироқ шаҳарларда белгиланган меъёрлардан четга чиқиб қурилиш ҳолатлари хавфли даражага етган. Қодиров мисол сифатида уч қават қуришга рухсат олиб, амалда 12 қаватли бино барпо этиш ҳолатларини келтирган. Унинг таъкидлашича, қурилиш соҳасида коррупция хавфи жуда юқори.
Депутат айрим қурилиш объектларида жуда катта маблағлар айланаётганини таъкидлаб, амалдаги қонунчилик ноқонуний қурилишларнинг олдини олишда етарли самара бермаётганини айтган.
"Битта ноқонуний қурилиш қилдими, квадрат метрига қўлланилаётган жазо уни бошиданоқ ҳисоб-китоб қилиб, бу ишни қилиш зарарли эканини кўрсатиши керак", — деган Қодиров.
Унинг фикрича, жарима миқдори шундай белгиланиши керакки, қурилиш меъёрларини айланиб ўтиш ёки кимгадир пул бериш орқали масалани ҳал қилиш тадбиркор учун манфаатли бўлмасин.
Қодиров Туркия, Венесуэла ва Колумбиядаги зилзилаларни мисол қилиб, қурилиш талабларига риоя қилинмаслиги инсонлар ҳаёти учун жиддий хавф туғдириши мумкинлигини таъкидлаган.
"Тадбиркор даромад кўриши керак экан деб аҳолини бундай катта хавфга солишимиз мумкин эмас", — деган депутат. Унинг таъкидлашича, тадбиркорлик ва иқтисодий манфаатларни қўллаб-қувватлаш муҳим, аммо аҳоли хавфсизлиги биринчи ўринда туриши керак.
"Мамлакатимизда аҳолимизнинг ҳаётини хавф остига қўядиган ҳар қандай тадбиркор бу мамлакатда даромад олиш тугул, яшаш ҳақида ҳам хавфга тушиб қолиши керак. Мамлакатимиз мана шундай хавфсиз мамлакат бўлиши керак", — деган у.
Биргина мисол, яқинда пойтахтда фуқароларга компенсация пуллари тўлиқ тўланмасдан ва мажбурий кўчириш ҳаракатлари якунланмасдан туриб уйларнинг ноқонуний бузиб ташлангани ҳамда рухсатномасиз кўп қаватли бинолар қурилгани аниқланганди.
Изоҳлар мавжуд емас