Ўзбекистон, Тошкент - Batafsil.uz. Эрон Олий раҳбари Мужтабо Хоманаийнинг идораси мамлакатнинг асосий хавфсизлик органи — Олий миллий хавфсизлик кенгашига янги раҳбар тайинлади. Эрон Ислом Инқилоби Қўриқчилар корпусининг (ИИҚК) 16 йил давомида қўмондони бўлган Моҳсен Резоий кенгаш котиби ва Олий раҳбарнинг ушбу органдаги вакили этиб белгиланди. Шунингдек, Эронда қатор юқори ҳарбий лавозимларга янги раҳбарлар тайинланган.
Жумладан, Али Абдуллоҳий Қуролли кучлар Бош штаби раҳбари, Али Озмаий ИИҚК ҳарбий-денгиз кучлари қўмондони этиб тайинланган. Бригадир генерал Аҳмад Воҳидий эса ИИҚК бош қўмондони сифатида тасдиқланган.
Моҳсен Резоий Ироқ билан уруш йилларини ҳам қамраб олган ҳолда 16 йил давомида ИИҚКни бошқарган. Кейинчалик у сиёсат ва иқтисод соҳасида фаолият юритиб, Мақсадга мувофиқлик кенгаши котиби бўлган ҳамда Иброҳим Раисий президентлиги даврида иқтисодий масалалар бўйича юқори лавозимларда ишлаган.
Таҳлилчилар Резоийнинг янги лавозимга тайинланишини Эроннинг уруш шароитида хавфсизлик, ҳарбий, дипломатик ва иқтисодий сиёсатини янада мувофиқлаштиришга қаратилган қадам сифатида баҳоламоқда. Жорж Вашингтон университети профессори Сино Озодийнинг таъкидлашича, тайинлов АҚШ билан музокараларда Эрон позициясининг юмшашини англатмайди.
Резоий аввалроқ АҚШ билан музокараларга нисбатан эҳтиёткор муносабат билдирган ва Ҳўрмуз бўғози масаласида кескин позицияни эгаллаган. Унинг тайинланиши Эрондаги консерватив кучлар томонидан ҳам ижобий қабул қилинган.
Айни пайтда собиқ хавфсизлик котиби Муҳаммад Боқир Золғадр Мўжтабо Хоманаийнинг сиёсий маслаҳатчиси этиб тайинланган. Золғадрнинг лавозимидан олиниши Эрон сиёсий доираларида хавфсизлик ва ташқи сиёсат йўналишидаги таъсирлар қайта тақсимланаётгани ҳақидаги баҳсларни кучайтирган.
Исроил Ташқи ишлар вазирлиги Резоий тайинловини кескин танқид қилган. Вазирлик Резоий ва Аҳмад Воҳидий 1994 йилда Буэнос-Айресдаги яҳудийлар марказида содир этилган портлаш билан боғлиқ иш бўйича Интерполнинг "қизил билдиришнома"сига киритилганини таъкидлаган.
Аввалроқ Эрон мудофаа вазири вазифасини бажарувчи Саййид Мажид Ибн Ризо Туркия мудофаа вазири Яшар Гулер билан телефон мулоқотида мусулмон давлатлари иштирокида минтақавий хавфсизлик механизмини яратиш таклифини илгари сурганди.
Изоҳлар мавжуд емас