Ўзбекистон, Тошкент - Batafsil.uz. 2026 йилнинг биринчи чораги давомида "Ўзсувтаъминот" компанияси комплаенс назорат тизими томонидан ўтказилган 94 та ўрганиш натижасида 1 612 та коррупциявий ҳолат аниқланган ва молиявий камчиликлар бартараф этилган.
Компаниянинг коррупцияга қарши ички назорат бўлинмаси бошлиғи Фарҳод Бойтўраев иштирокидаги брифингда маълум қилинишича, асосий қонунбузарликлар истеъмолчилардан йиғилган тўловлар билан боғлиқ.
Хусусан, 1 097 та ҳолатда аҳоли ва юридик шахслардан йиғилган 1,8 миллиард сўмлик маблағ банк ҳисоб рақамларига топширилмагани маълум бўлган.
Давлат харидларидаги 825 та шартнома таҳлил қилиниб, 27 та ҳолатда 3,7 миллиард сўмлик камчиликлар тузатилган ва 1,39 миллиард сўм бюджет маблағи иқтисод қилинган.
10 та ҳолатда 481 миллион сўмлик иш ҳақи нотўғри ҳисоблангани, 17 та ҳолатда эса 76,3 миллион сўмлик товар-моддий бойликлар кирим қилинмагани аниқланиб, бартараф этилган.
Шунингдек, ўрганишлар давомида 6 та манфаатлар тўқнашуви ҳолати аниқланиб, уларнинг аксарияти ҳал этилган.
Тизимдаги коррупциявий ҳолатларга йўл қўйган 23 нафар ходим эгаллаб турган лавозимидан озод этилган. Яна 17 нафар ходимга ҳайфсан ва интизомий жазо чоралари қўлланган. Жиддий қонунбузарликлар бўйича 28 та ҳолат юзасидан тўпланган ҳужжатлар ҳуқуқни муҳофаза қилувчи органларга тақдим этилган.
Изоҳлар мавжуд емас