Ўзбекистон, Тошкент - Batafsil.uz. BP Ўзбекистоннинг Устюрт ҳудудида жойлашган олтита нефть ва газ қидирув блоки бўйича 40 фоиз улушни сотиб олганини маълум қилди. Компания баёнотига кўра, BP ушбу улушни SOCAR ва Ўзбекнефтгаз компанияларидан харид қилган.
Янги тақсимотга мувофиқ, SOCAR ва Ўзбекнефтгаз ҳар бири 30 фоиздан улушга эга бўлади. Қайд этилишича, лойиҳалар оператори сифатида SOCAR фаолият юритишда давом этади.
Гап Бойтерак, Теренгқудуқ, Бирқори, Харой, Қорақалпоқ ва Қулбой нефть-газ блоклари ҳақида кетмоқда. Ушбу хорижий компаниянинг Озарбайжон, Грузия ва Туркия бўйича минтақавий президенти Жио Кристофоли Ўзбекистон катта ресурс салоҳиятига эга эканини таъкидлаган.
Унинг сўзларига кўра, компания Ўзбекистонда нефть ва газ ресурсларини қидириш ҳамда ривожлантиришда иштирок этишни муҳим имконият деб ҳисоблайди.
Маълумот учун, BP 2021 йилда "яшил энергетика" сиёсати доирасида минтақадаги қидирув ишларидан чиққан. Ўша вақтда компания 2030 йилгача нефть ва газ ишлаб чиқаришни 40 фоизга қисқартириш режасини эълон қилган. Бироқ ҳозир компания қайтадан анъанавий энергия манбалари — нефть ва газ соҳасига фаол қайтмоқда.
BP илк бор SOCAR ва Ўзбекнефтгаз билан Ўзбекистондаги қидирув битимларини 2018 йилда имзолаган.
2024 йилда Канаданинг Condor компанияси ҳам Газли ҳудудининг саккизта конида газ қазиб олиш учун янги технологияларни жорий этганди. Қазиб олинган ёқилғи тўлалигича ички бозор учун мўлжалланган эди.
Изоҳлар мавжуд емас