Ўзбекистон, Тошкент - Batafsil.uz. Тошкентдаги "Бунёдкор" стадиони электр энергиясидан қарийб 2 миллиард сўмлик қарздорлик сабабли 2026 йилнинг 4 сентябрь куни электр таъминотидан тўлиқ узиб қўйилган эди. Ўзбекистон профессионал футбол лигаси (ПФЛ) хабарига кўра, спорт мажмуаси ва шу номдаги клуб айни пайтда чуқур молиявий инқирозга юз тутган.
Молиявий муаммолар электр қарздорлиги билан чекланиб қолмаган. Стадион ва клуб нафақат коммунал тўловлар, балки ходимларнинг иш ҳақи, солиқлар ва янги майдон қопламасини ётқизган пудратчи компаниядан ҳам қарздор бўлиб қолган. Сув ва чим парвариши учун зарур шароитлар йўқлиги сабабли қайта тикланган янги майдон қопламаси ҳам нобуд бўлиш ёқасига келиб қолган.
Шунингдек, клубнинг бошқа мажбуриятлари ҳам мавжуд. Бундан ташқари, клуб бразилиялик машҳур футболчи Ривалдо ҳамда япониялик Ицуки Урата олдидаги қарзлари сабабли ФИФА томонидан қўйилган трансфер тақиқига ҳам эга.
Электр таъминотининг узилиши эса вазиятни янада оғирлаштирган. Майдонларни ва биноларни ижарага олган тадбиркорлар ҳам мажмуани тарк эта бошлаган. Шу сабабли ПФЛ футбол жамоатчилиги ва мухлисларга мурожаат қилиб, "Бунёдкор" стадионини ушбу мураккаб вазиятдан олиб чиқиш учун имконият даражасида (ҳеч бўлмаганда 1000 сўмдан) молиявий ёрдам кўрсатишга чақирган.
"Пул ўтказиш учун ҳаволага киринг ёки иловани юклаб олинг ва "Бунёдкор" стадиони бўлими орқали ўз ёрдамингизни етказинг", — дейилади Ўзбекистон Профессионал футбол лигаси матбуот хизмати тарқатган баёнотда.
Изоҳлар мавжуд емас