Ўзбекистон, Тошкент - Batafsil.uz. Соғлиқни сақлаш вазирлиги биносида қизамиқ ва қизамиқдан кейин ривожланиши мумкин бўлган оғир неврологик касаллик — Ўткир ости склерозланувчи панэнцефалити (қисқача ЎОСПЭ) билан касалланган болаларнинг ота-оналари билан учрашув ўтказилди. Ота-оналарнинг айтишича, мамлакат бўйича 350 нафарга яқин бола ушбу касаллик билан яшамоқда.
Учрашувда ота-оналар болаларни зарур дори воситалари билан таъминлаш, улар учун махсус шифокорлар гуруҳини бириктириш, реабилитация тизимини йўлга қўйиш ҳамда қизамиқ билан касалланган беморлар учун алоҳида шифохона ёки бўлим ташкил этиш масалаларини кўтарган.
ЎОСПЭ 2025 йил 3 ноябрдаги Президент қарори билан камёб касалликлар қаторига киритилган. Ҳужжатга кўра, склерозловчи панэнцефалит билан касалланган беморлар давлат томонидан бепул дори воситалари, махсус озиқлантириш ва тиббий буюмлар билан таъминланиши белгиланган. Бу тартибни молиялаштириш 2026 йилдан бюджет маблағлари ҳисобидан амалга оширилиши кўзда тутилган.
Шунга қарамай, учрашув иштирокчилари дори таъминотида узилишлар бўлаётганини айтмоқда. Улар айрим дориларни ўз маблағлари ҳисобидан харид қилишга мажбур бўлаётганини билдирган. Ота-оналар вакилларидан бири фарзанди учун 2023 йилдан буён даволаш, дори-дармон, хорижлик мутахассислар ва бошқа тиббий хизматларга жами 70–80 минг доллар сарфланганини айтди.
Учрашувда дори воситаларини ўз вақтида харид қилиш учун буюртмаларни олдиндан шакллантириш масаласи ҳам кўтарилган. Айрим препаратларни олиб келиш жараёни 6–9 ойгача давом этиши мумкин. Шу боис 2027 йил учун зарур дори воситалари рўйхатини ҳозирдан шакллантириш таклиф қилинган. Айрим препаратлар махсус назоратдаги воситалар тоифасига кириши уларни харид қилиш ва ҳисобга олиш жараёнини мураккаблаштираётгани ҳам айтилган.
Шу билан бирга учрашувда қатнашганлар ЎОСПЭ билан касалланган болаларга ёрдам кўрсатиш учун алоҳида тиббий бўлим ёки ихтисослаштирилган шифохона ташкил этишни ҳам сўраган. Шунингдек, инфекционист, вирусолог, невролог ва бошқа мутахассислардан иборат кўп тармоқли тиббий консилиум ташкил этиш зарурлиги таъкидланган. Уларнинг бугунги учрашувдаги асосий мақсади ҳам шу бўлган.
Ота-оналар вакилининг маълумотига кўра, Миллий болалар тиббиёт марказида ЎОСПЭ билан ишлайдиган мутахассислар сони чекланган. Унинг айтишича, айни пайтда уч нафар мутахассис беморларни қабул қилмоқда, бир шифокорга кунига 10–15 нафар бемор тўғри келиши мумкин. Шу сабабли ота-оналар доимий тиббий кузатув ва реабилитация тизимини йўлга қўйишни талаб қилмоқда.
Унинг айтишича, Ўзбекистонда ЎОСПЭ билан касалланганлар сони 350 нафар атрофида. Бироқ ушбу рақамлар расмий статистика сифатида тақдим этилмаган ва турли ота-оналар томонидан билдирилган кўрсаткичлар бир-биридан фарқ қилади.
Ота-оналарнинг асосий талаблари орасида дори воситаларини узлуксиз етказиб бериш, мутахассислар сонини ошириш, болаларни мунтазам реабилитация билан қамраб олиш, ҳудудларда тиббий ёрдамни кучайтириш ҳамда касаллик билан ишлайдиган алоҳида тиббий тизим яратиш бор.
Учрашув иштирокчиларидан бири, шунингдек, бугунги мурожаатидан асосий мақсад нафақат касалланган болаларга ёрдам олиш, балки касаллик сабабларини ўрганиш ва янги ҳолатларнинг олдини олиш эканлигини таъкидлади.
"Биз бу ерга ушбу касалликнинг олдини олиш, тарқалишининг олдини олиш мақсадида келдик. Ҳозирда 300 дан ортиқ ҳолат мавжуд. Бу масалада ёрдамингизни аямаслигингизни сўраймиз," - деди у.
Учрашув якунида вазир барчанинг муаммоларини босқичма-босқич ҳал этиш зарурлигини билдирган. Томонлар ишчи гуруҳ тузишга келишган бўлиб, унга киритиладиган тўрт нафар ота-она вакили республика бўйлаб бошқа ота-оналар билан мунтазам алоқада бўлиб, ишларнинг бориши ҳақида маълумот бериб бориши айтилган.
Изоҳлар мавжуд емас