Ўзбекистон, Тошкент - Batafsil.uz. 2026 йил 8 сентябрь куни Халқаро футбол федерацияси (ФИФА) президенти Жанни Инфантинони тергов қилишни талаб қилувчи петицияга 100 мингдан ортиқ киши имзо чекди.
Инсон ҳуқуқлари бўйича "FairSquare" ташкилоти томонидан илгари сурилган мурожаатда ФИФА раҳбари сиёсий бетарафлик тамойилини бузиш, ваколатларини суиистеъмол қилиш ҳамда АҚШ Президенти Дональд Трамп билан муносабатлари орқали ташкилотнинг этика кодексини бузганликда айбланаётгани қайд этилган.
"FairSquare" август ойида ФИФАнинг Этика қўмитасига шикоят киритган. Бундан аввал Халқаро Олимпия қўмитасига юборилган мурожаат унинг ваколат доирасига кирмаслиги сабабли рад этилган.
Шу билан бирга, Инфантино раҳбарлигида ФИФА мусобақалари, жумладан, Жаҳон чемпионати тижорий ҳуқуқларига хусусий инвесторларни жалб этиш ва 4,2 миллиард доллар маблағ йиғишни назарда тутган "FIFA Forward Enterprise" лойиҳаси ҳам жиддий эътирозларга сабаб бўлди.
Лойиҳа 31 июль куни бекор қилинганига қарамай, УЕФА, ОФК ва КОНКАКАФ Инфантинонинг истеъфосини талаб қилди. Африка ва Жанубий Америка футбол конфедерациялари эса уни қўллаб-қувватлашда давом этмоқда.
Маълумот учун, 2016 йилдан бери ФИФАни бошқариб келаётган 56 ёшли Инфантино 2027 йил мартида бўлиб ўтадиган сайловларда тўртинчи муддатга ўз номзодини қўйишини билдирган. Номзодларни тақдим этишнинг сўнгги муддати жорий йил 18 ноябрь этиб белгиланган. Ҳозирча унга расмий рақиб чиққани йўқ.
Эслатиб ўтамиз, Халқаро футбол федерацияси раҳбари Жанни Инфантино жаҳон чемпионати ҳуқуқлари атрофидаги шов-шувли жанжал фонида ҳам ўз лавозимини сақлаб қолишга муваффақ бўлганди.
Изоҳлар мавжуд емас