Ўзбекистон, Тошкент - Batafsil.uz. 2027 йил 1 январдан Ўзбекистонда муддатли тўлов хизматларига янги талаблар жорий этилади. Унга кўра, "рассрочка"га олинаётган товар, иш ёки хизмат қиймати 250 БҲМдан, яъни матнда келтирилган ҳисоб бўйича қарийб 110 миллион сўмдан ошмаслиги керак.
Янги тартиб Президентнинг "Аҳолига муддатли тўлов хизматлари кўрсатилишини такомиллаштириш чора-тадбирлари тўғрисида"ги қарорида белгиланган.
Шунингдек, муддатли тўлов бўйича истеъмолчининг энг кўп мажбурият муддати 12 ой билан чекланади. Асосий қарздан ташқари комиссия, жарима, пеня ва бошқа тўловларнинг умумий миқдори эса йилига муддатли тўлов суммасининг 50 фоизидан ошмаслиги керак.
Операторнинг комиссияси, устама тўловлари ва товар ёки хизматнинг якуний қийматига қўшиладиган бошқа тўловлар шартномада алоҳида кўрсатилиши шарт.
Истеъмолчи муддатли тўловни исталган вақтда тўлиқ ёки қисман қўшимча жарима, пеня ва комиссияларсиз муддатидан олдин тўлаш ҳуқуқига эга бўлади.
Янги тартиб билан муддатли тўлов хизматларини кўрсатувчи операторлар фаолияти ҳам алоҳида тартибга солинади. Банклар ва микромолия ташкилотларидан ташқари, бундай хизматларни кўрсатувчи юридик шахслар ҳам Марказий банк шакллантирадиган тегишли реестрга киритилганидан сўнг фаолият юритиши мумкин бўлади.
Операторларга молиявий истеъмол кредитлари ажратиш ва жисмоний шахслардан пул маблағларини жалб қилиш тақиқланади.
Кўчмас мулк ҳамда қонунчиликка кўра муомаласи тақиқланган ёки чекланган мол-мулк муддатли тўлов объекти бўлиши мумкин эмас.
Изоҳлар мавжуд емас