Кореяда E-9 визаси билан ишловчилар иш жойини ўзгартиришда Агентлик розилигини олмайди

Ўзбекистон, Тошкент - Batafsil.uz.  Ўзбекистонлик фуқаролар энди Корея Республикасида E-9 визаси асосида иш жойини ўзгартириш учун Миграция агентлигининг олдиндан розилигини олиши шарт эмас. Бу талаб фуқаролар билан тузиладиган уч томонлама шартномадан чиқариб ташланди.

Аввалроқ  Жанубий Кореянинг Ульсан шаҳрида ишлаётган ўзбекистонлик мигрантлар иш берувчини алмаштиргани учун ойига 2 минг долларгача жарима тўлаш мажбурияти юклангани ҳақида шикоят қилгани ҳақида хабар берган эдик. Жанубий Корея Меҳнат ва бандлик вазирлиги бу тартибни адолатсиз деб баҳолаб, Ўзбекистон томонидан уни қайта кўриб чиқишни талаб қилганди.

Шу сабабли Миграция агентлиги Корея Республикасида вақтинчалик меҳнат фаолиятини амалга ошириш учун юборилаётган фуқаролар билан тузиладиган шартноманинг айрим бандларини қайта кўриб чиққан. Аввалги тартибга кўра, фуқаро иш жойини ўзгартиришдан олдин Миграция агентлигининг Корея Республикасидаги ваколатхонаси розилигини олиши керак эди. Ушбу талаб бажарилмаган ҳолатларда жарима қўллаш ҳам назарда тутилган.

Янги тартибда эса иш жойини ўзгартириш учун Агентлик ваколатхонасининг олдиндан розилигини олиш ва бундай розиликсиз иш жойини ўзгартирганлик учун жарима белгилашга оид бандлар шартномадан чиқарилган.

Шу билан бирга, мазкур ўзгариш Корея Республикасининг E-9 визаси бўйича амалдаги қонунчилик талабларини бекор қилмайди. Фуқаролар иш берувчи билан меҳнат шартномасини амалдаги қонунчиликда белгиланган тартибда бекор қилиши ва янги иш берувчи билан меҳнат муносабатларига киришиши мумкин.

E-9 визаси билан ишлаётган фуқаро меҳнат шартномасини бекор қилганидан кейин бир ой ичида иш изловчи сифатида давлат рўйхатидан ўтиши ва 90 кун ичида янги ишга жойлашиши лозим. Белгиланган муддатларда ишга жойлашмаган шахс Корея Республикаси ҳудудини тарк этиши керак.

Акс ҳолда фуқаро ноқонуний мақомга ўтиши мумкин. Бундай ҳолатда Корея қонунчилигига мувофиқ жарима, депортация ва мамлакатга қайта киришга тақиқ қўлланилиши эҳтимоли бор.

Шунингдек, шартномада Кореяда ноқонуний мақомда қолганлик учун жарима қўллашга оид норма сақлаб қолинган.

Миграция агентлиги фуқароларни иш жойини ўзгартириш жараёнида Корея Республикаси қонунчилигида белгиланган тартиб ва муддатларга қатъий риоя қилишга чақирган.