Ўзбекистон, Тошкент - Batafsil.uz. Ўзбекистондаги айрим олий таълим муассасаларида 2026/2027 ўқув йили учун дифференциал тўлов-контракт, яъни супер-контракт нархи 200 миллион сўмдан ошди. Ҳозирча энг юқори сумма Тошкент давлат юридик университетида белгиланган бўлиб, кундузги бакалавриатда бир йиллик ўқиш учун қарийб 270 миллион сўмни ташкил этади.
Супер-контракт камида 56,7 балл тўплаган, аммо белгиланган ўтиш баллига етарли балл тўплай олмагани сабабли контракт асосида ўқишга кира олмаган абитуриентлар учун мўлжалланган. Аниқ сумма танланган таълим йўналиши, ўқиш шакли ва етишмаган баллар сонига қараб белгиланади.
Хусусан, Тошкент давлат юридик университетида кундузги бакалавриат учун бир йиллик супер-контракт миқдори қарийб 269 миллион 960 минг сўмни ташкил этади.
Уч йиллик кечки бакалавриатда бир йиллик ўқиш нархи 132 миллион 100 минг сўм этиб белгиланган.
Магистратурада кундузги таълим учун супер-контракт 122 миллион сўм, кечки таълим учун эса 97 миллион 600 минг сўмни ташкил этади.
Наманган давлат университетида супер-контракт миқдори таълим йўналишига қараб сезиларли даражада фарқ қилади. Кундузги таълимда у 26 миллион 932 минг 500 сўмдан 122 миллион 620 минг сўмгача белгиланган. Кечки ва масофавий таълимда эса тўлов миқдори 31 миллион 384 минг 500 сўмдан 128 миллион 560 минг сўмгача ўзгаради. "Даволаш иши", "Педиатрия" ва "Олий ҳамширалик иши" йўналишлари учун кундузги таълимда супер-контракт 114 миллион 120 минг сўм этиб белгиланган.
Тошкент ахборот технологиялари университетида етишмаган баллар миқдорига қараб янада батафсил градация амал қилади. Агар абитуриент ўтиш баллига 1,05 баллгача етмай қолган бўлса, супер-контракт базавий контрактнинг 1,5 баробари — 18 миллион 150 минг сўмдан 24 миллион 750 минг сўмгача бўлади. Етишмаган баллар 3,06 баллдан 4,05 баллгача бўлса, тўлов миқдори 36 миллион 300 минг сўмдан 49 миллион 500 минг сўмгача ошади. Масофавий таълимда эса супер-контракт миқдори 23 миллион 100 минг сўмдан 59 миллион 400 минг сўмгачани ташкил этади.
Наманган давлат педагогика институтида кундузги ва кечки таълим шакллари учун супер-контракт 22 миллион 940 минг сўмдан 31 миллион 905 минг сўмгача этиб белгиланган.
Тошкент кимё-технология институтининг Янгиёр филиалида эса супер-контракт миқдори таълим йўналиши ва ўқиш шаклига қараб 22 миллион 200 минг сўмдан 48 миллион 120 минг сўмгачани ташкил этади.
Андижон давлат чет тиллар институтида супер-контракт нархи 29 миллион 600 минг сўмдан 47 миллион 220 минг сўмгача белгиланган. Бунда йўналишга қараб тўлов миқдори базавий контрактнинг 4 ёки 5 баробари сифатида белгиланган.
Андижон давлат университети эса супер-контракт миқдорини базавий контрактнинг 4 бараваридан 6 бараваригача этиб белгилаган. Бироқ хабар эълон қилинган пайтда ўқишнинг якуний базавий нархи ҳали тўлиқ тасдиқланмаган эди. Университет маълумотига кўра, супер-контрактнинг максимал миқдори босқичма-босқич камайтирилган: аввал у базавий контрактнинг 10 бараваригача бўлган, кейин 8 бараварига туширилган, ҳозир эса 6 бараварни ташкил этмоқда.
Муҳим жиҳати шундаки, супер-контракт фақат биринчи ўқув йили учун тўланади. Абитуриентни талаба сифатида қабул қилиш учун белгиланган сумманинг камида 50 фоизини тўлаши керак. Биринчи курсни муваффақиятли якунлагандан сўнг талаба ўқишни умумий тартибда давом эттиради ва оддий контракт тўловини амалга оширади.
Ҳозирча супер-контракт миқдорини фақат айрим олий таълим муассасалари эълон қилган. Айни пайтда Ўзбекистонда 215 та олий таълим муассасаси фаолият юритиб, уларда қарийб 1,6 миллион нафар талаба таҳсил олмоқда.
Изоҳлар мавжуд емас