Ўзбекистон, Тошкент - Batafsil.uz. Мустақиллик шоҳкўчасининг 1,7 километрлик қисмида кенг кўламли реконструкция ишлари якунланди. Бу ерда нафақат асфальт, балки светофорлар, бекатлар, йўлаклар, дренаж, муҳандислик тармоқлари ва яшил ҳудудлар ҳам янгиланди. Энди кўча янгиланган форматда ҳаракатланиш учун тайёр.
Ишлар 46 минг квадрат метрдан ортиқ йўл қопламасини қамраб олди. Дастлаб эски асфальтни тўлиқ фрезерлашди, шундан сўнг пойдевор мустаҳкамланди. Сўнгра 9 сантиметрли йирик донали асфальт-бетон ётқизилди.
Йўл қопламаси қатламлари орасидаги қўшимча мустаҳкамлик учун қарийб 58 минг квадрат метр базальт геотўридан фойдаланилди. Юқори қатлам 5 сантиметр қалинликдаги ПШМА-20 полимер-шағал-мастикали асфальт-бетон бўлиб, у билан ҳам 46 минг квадрат метр майдон қопланди. Янги йўл белгиларини чизиш и ишлари якунланди.
Ўзгаришлар ҳаракатни ташкил этишга ҳам таъсир кўрсатди. Участкага янги светофорлар ўрнатилди ва чорраҳалардаги тартибга солиш модернизация қилинди. Жамоат транспорти йўловчилари учун олтита замонавий автобус бекати барпо этилди.
Алоҳида ишлар мажмуаси ер остида амалга оширилди. Ёмғир ва оқова сувларни чиқариб юборишни яхшилаш мақсадида мавжуд 1,8 минг метр сув чиқариш новлари алмаштирилди, илгари мавжуд бўлмаган жойларга яна 1,6 минг метр сув чиқариш новлари қўшилди. Бундан ташқари, 111 погон метр металл қувурлар ётқизилди ва мавжуд тизимнинг 500 метри янгиланди.
Пиёдалар учун йўлак ва ўтиш жойлари қурилиб, 3,4 минг метр бордюр ўрнатилди. Шунингдек, 1,7 минг метр суғориш тизими қувурлари ётқизилиб, кўча бўйидаги яшил ҳудудлар ободонлаштирилди.
Хиёбон бўйлаб яшил ҳудудларни ободонлаштириш билан ўзгаришлар якунланди. Натижада Мустақиллик шоҳкўчаси янги йўл, қулай бекатлар, обод йўлаклар ва яшил ҳудудларга эга замонавий шаҳар магистралига айланди.
Аввалроқ Фитрат ва Гейдар Алиев кўчалари чорраҳасида светофор қайта созланиб, "яшил" чироқ ёниши узайтирилган эди.
Изоҳлар мавжуд емас