Ўзбекистон, Тошкент - Batafsil.uz. Солиқ қўмитаси банклар ва солиқ органлари ўртасида ахборот алмашинувига оид лойиҳа бўйича юзага келган муҳокамаларга расмий муносабат билдирди. Қўмитанинг таъкидлашича, ушбу лойиҳа фақатгина солиқ назорати учун зарур бўлган ахборотни тақдим этишнинг техник тартиби, муддатлари ва электрон шаклларини белгилашни кўзда тутади.
Уларнинг айтишича, лойиҳа солиқ органларига қўшимча ваколатлар бермайди ва банк сирини бекор қилмайди. Банклар маълумотларни фақат амалдаги қонунчиликда белгиланган ҳолатларда тақдим этишга ҳақлидир.
Солиқ органларининг бу борадаги ваколатлари Солиқ кодексининг 134-моддасида мустаҳкамланган. Шунингдек, "Банк сири тўғрисида"ги қонунга кўра, солиқ солиш масалалари бўйича маълумотлар давлат солиқ хизматига белгиланган тартибда тақдим этилиши мумкин.
Солиқ органлари томонидан олинган ахборотлар "солиқ сири" ҳисобланади. Уларни ошкор этиш, учинчи шахсларга бериш ёки нотўғри мақсадларда фойдаланиш қонун билан тақиқланган.
Расмий орган бундай ахборот алмашинуви механизмлари Иқтисодий ҳамкорлик ва тараққиёт ташкилоти мамлакатларида кенг қўлланилади ва жаҳон стандартларига мос келишини, Ўзбекистон ҳам солиқ мақсадларида шаффофликни таъминлаш бўйича халқаро форум аъзоси эканлигини эслатган.
Ҳужжат лойиҳаси ҳозирда жамоатчилик муҳокамаси учун жойлаштирилган.
Маълумот учун, Ўзбекистон Республикаси Вазирлар Маҳкамаси томонидан банклар томонидан юридик ва жисмоний шахсларнинг ҳисобварақлари ҳамда омонатларига оид ахборотларни солиқ органларига тақдим этиш тартибини белгиловчи низом лойиҳаси муҳокамага қўйилганди. Ушбу ҳужжат иқтисодчилар ва жамоатчилик ўртасида жиддий баҳс-мунозараларни келтириб чиқарган эди.
Изоҳлар мавжуд емас