Ўзбекистон, Тошкент - Batafsil.uz. Халқ депутатлари Тошкент шаҳар кенгаши пойтахт метрополитени учун 14 та беш вагонли поезд, жами 70 та вагон харид қилиш лойиҳаси концепциясини маъқуллагани маълум қилинди.
Лойиҳанинг умумий қиймати танланадиган етказиб берувчи ва кредит шартларига қараб 168,6 миллион доллардан 356,2 миллион долларгача баҳоланмоқда.
Янги таркиблар хизмат муддати тугаб бораётган эски вагонлар ўрнини эгаллайди.
Харид бўйича энг мақбул ва асосий таклифлар сифатида қуйидаги компаниялар кўриб чиқилмоқда:
Таклифларга кўра, CRRC поездларининг ўзи 118,3 миллион долларга баҳоланган. Лойиҳа Хитой Эксимбанкининг йиллик 3 фоизли, 20 йил муддатга бериладиган кредити орқали молиялаштирилиши кўзда тутилган.
Hyundai Rotem поездларининг нархи 179,4 миллион доллар этиб белгиланган. Компания таклифи Корея Эксимбанкининг йиллик 0,05 фоизли, 20 йил муддатга ажратиладиган кредити билан боғлиқ.
Россиянинг GTR компанияси поездларни 158,7 миллион долларга таклиф қилган бўлса-да, лойиҳанинг умумий қиймати 247,95–251,93 миллион долларга етган. Россия томонидан таклиф этилган кредит шартлари йиллик 9 фоиз ва 12 йиллик муддатни назарда тутади.
Танловда Франциянинг Alstom компанияси 125,6 миллион долларлик, Испаниянинг CAF компанияси 134,7 миллион долларлик, Чехиянинг Škoda Transportation компанияси 164,2 миллион долларлик ва Япониянинг Kawasaki Rail Car компанияси 279,1 миллион долларлик таклифлари билан иштирок этган.
Поездларни етказиб бериш ва фойдаланишга топшириш ишларини 2027 йил ноябрига қадар якунлаш режалаштирилган.
Аввалроқ 2025 йил февраль ойида Тошкент метрополитенининг вагон паркига учта янги замонавий метро поездлари олиб келинганди.
Изоҳлар мавжуд емас