Ўзбекистон, Тошкент - Batafsil.uz. Тошкент шаҳрида электр таъминотидаги ҳар кунлик узилишлар одатий ҳолга айланиб улгургани соҳада жиддий муаммолар борлигини яққол кўрсатиб турибди. Бироқ, "Ҳудудий электр тармоқлари" корхонаси (ҲЭТ) электр таъминотидаги мунтазам носозликларни яқинлашиб келаётган куз-қиш мавсумига тайёргарлик билан изоҳлади ва аҳолини режалаштирилган ўчиришлар ҳақида яхшироқ хабардор қилишга ваъда берди.
"Ҳозирда "Ҳудудий электр тармоқлари" акциядорлик жамияти томонидан куз-қиш мавсумига тайёргарлик кўриш, шунингдек, Давлат дастурлари, тармоқ қарорлари ва фармонлари ижросини таъминлаш мақсадида Тошкент шаҳри ва ҳудудлардаги тақсимловчи тармоқларни реконструкция қилиш ва таъмирлаш ишлари олиб борилмоқда," - дейилади компания хабарида.
Шунингдек, пойтахт ва вилоятларда режали ўчиришлар жойларда ишлаётган электрчиларнинг хавфсизлигини таъминлаш мақсадида амалга оширилаётгани маълум қилинди. Матбуот хизматининг ишонтиришича, режали узилишлар ҳақидаги маълумотлар компаниянинг Тошкент ва вилоятлардаги корпоратив каналларида мунтазам равишда эълон қилиб борилади.
Қайд этилишича, тармоқларни янгилаш ва мавсумга тайёргарлик кўриш соҳадаги долзарб вазифалардан бири. У ёзнинг иссиқ кунларига қарамай ўтказилади.
Куннинг иссиқ вақтида айрим ҳудудлардаги авариявий ҳолатлар ҳам электр таъминотидаги узилишларга сабаб бўлаётганини эътироф этишди. Бундай ҳолларда авария-қутқарув бригадалари уларни қисқа муддатларда бартараф этади.
Компания юзага келган ноқулайликлар учун истеъмолчилардан узр сўраб, аҳолининг режали узилишлар ҳақида хабардорлигини оширишини маълум қилди.
Изоҳлар мавжуд емас