Ўзбекистон, Тошкент - Batafsil.uz. Тошкент шаҳрининг Бектемир тумани ҳудудидан ўтувчи А373 "Тошкент–Ўш" автомобиль йўлининг 1-километрида жойлашган Чирчиқ дарёси кўпригида муҳим таъмирлаш ишлари олиб борилиши муносабати билан ҳаракат бир томонлама чекланди.
Маълум қилинишича, ушбу чеклов жорий йилнинг 28 октябрь куни соат 08:00 дан 30 октябрь куни соат 08:00 га қадар амал қилади.
Белгиланган вақт оралиғида Тошкент шаҳридан Водий йўналиши бўйича автотранспорт воситаларининг ҳаракатланиши тўлиқ тўхтатилади.
Йўл таъмирлаш ишлари давомида ҳайдовчиларга қулайлик яратиш ва тирбандликларнинг олдини олиш мақсадида муқобил ҳаракатланиш йўналишлари ташкил этилган.
Жумладан, Тошкент шаҳридан Оҳангарон шоссесига чиқмоқчи бўлган ҳайдовчилар Тошкент ҳалқа автомобиль йўлининг 47-километридан, яъни "Роҳат" айланма йўли орқали Қўйлиқ йўналиши бўйлаб ҳаракатланишлари мумкин.
Шунингдек, Юқоричирчиқ туманидан Тошкент шаҳрига кириб келувчи ҳайдовчилар учун ҳаракат Д012 "Бектемир ш. – Чирчиқ ш. – Ғазалкент ш. – Чорбоғ қўрғони" автомобиль йўлининг 6-километридан Ийк-ота ва Фарғона йўли кўчалари орқали йўналтирилади.
Мутасаддилар барча ҳаракат қатнашчиларидан юзага келадиган вақтинчалик ноқулайликларни инобатга олиб, ҳаракат йўналишларини олдиндан режалаштиришни сўраб огоҳлантиришган.
Изоҳлар мавжуд емас