Ўзбекистон, Тошкент - Batafsil.uz. Тошкентни 1966 йилги зилзиладан кейин қайта тиклаш ишларида қатнашган таниқли архитектор Юрий Мирошниченко 89 ёшида вафот этди. У пойтахтдаги турар жой мавзеларини лойиҳалаш ва кўп қаватли уйлар фасадларида машҳур мозаикалар пайдо бўлишига ҳисса қўшган.
Архитекторнинг вафоти ҳақида архитектура мероси тадқиқотчиси Фотима Абдураҳмонова 10 ноябрь куни хабар берган. Унинг айтишича, Мирошниченко умрининг сўнгги йилларигача ўз касбий фаолиятини давом эттирган ва Тошкент архитектураси тарихи билан қизиққан.
Самарқандда туғилган Мирошниченко Тошкент политехника институтининг архитектура бўлимини тамомлаган. У 1960 йилдан меҳнат фаолиятини бошлаб, Чилонзордаги турар жой мавзеларини лойиҳалашда қатнашган. Кейинчалик ўз архитектура устахонасига асос солган.
Унинг муҳим ташаббусларидан бири Тошкентдаги кўп қаватли уйларни мозаик паннолар билан безаш ғоясини қўллаб-қувватлаш бўлган. Зилзиладан кейин рассомлар Жарский ака-укалари таклиф этган ушбу лойиҳани Мирошниченко маъқуллаган. Кейинчалик мозаикалар пойтахт меъморий қиёфасининг ўзига хос белгиларидан бирига айланган.
Архитектор иштирок этган лойиҳалар орасида бугун Рус драма театри жойлашган собиқ Билимлар уйи ҳам бор. У, шунингдек, рассомлик билан шуғулланган, эски Тошкент тарихини ўрганган ва шаҳарга оид архив суратларини тўплаган.
2025 йилда унинг касбий фаолияти ва хотираларига бағишланган "Хотиралар калейдоскопи" автобиографик китоби нашр этилган. Юрий Мирошниченко Домбробод қабристонига дафн этилган.
Изоҳлар мавжуд емас