Ўзбекистон, Тошкент - Batafsil.uz. Тошкентдаги ўқув марказларидан бирида сақланаётган катта миқдордаги пулни ўғирлашга уринган тўрт киши ушланди. Жиноий режани шу марказда аввал қоровул бўлиб ишлаган 31 ёшли эркак тузган. Унинг шерикларидан бири эса шахсини яшириш учун аёллар кийимини кийган.
Тошкент шаҳар ИИББ маълум қилишича, собиқ қоровул ўқув марказининг ички тартиби, пул сақланадиган жой ва бинога кириш имкониятларини яхши билган. У режани амалга ошириш учун уч нафар танишини жалб қилган ва ҳар бирига алоҳида вазифа белгилаган.
Режага кўра, собиқ қоровул шерикларига пул сақланадиган жой ҳақида маълумот бериши, гуруҳ аъзоларидан бири электр таъминотини узиши керак бўлган. Қолганлар эса юзларини ниқоб билан беркитиб, бинога орқа эшикдан кириши, пулларни қопларга жойлаб, олдиндан ижарага олинган машинада олиб кетиши режалаштирилган.
Жиноят изларини яшириш учун гуруҳ аъзоларидан бири аёллар кийимини кийиб олган. Гумонланувчилар пулларни ўзаро тенг тақсимлашни, кейин эса Фарғона вилояти орқали қўшни давлатлардан бирига чиқиб кетишни мўлжаллаган.
Тезкор тадбир Тошкент шаҳар ИИББ ва Давлат хавфсизлик хизмати ходимлари ҳамкорлигида ўтказилган. Гумонланувчилардан ниқоблар, болға, қоп, қўлқоп, рациялар, эшикларни очиш учун махсус мосламалар, калитларнинг нусхалари ҳамда хорижга чиқиш паспортлари ашёвий далил сифатида олиб қўйилган.
Ҳолат юзасидан Жиноят кодексининг 164-моддаси (босқинчилик) билан жиноят иши қўзғатилган. Ушланганларга нисбатан қамоққа олиш эҳтиёт чораси қўлланилган, тергов давом этмоқда.
Изоҳлар мавжуд емас