Ўзбекистон, Тошкент - Batafsil.uz. Ўзбекистонда фуқароларни қурилиши тугалланмаган ва расман фойдаланишга топширилмаган кўп қаватли уйларда яшашга рухсат берганлик учун жиноий жавобгарлик жорий этиш режалаштирилмоқда.
Тегишли қонун лойиҳаси Қонунчилик палатаси томонидан қабул қилинди.
Парламент қуйи палатасидан маълум қилишларича, шаҳарсозлик соҳасида амалга оширилаётган ислоҳотларга қарамай, мамлакатда фуқаролар қурилиши тугалланмаган, фойдаланишга топшириш тартибидан ўтмаган кўп қаватли уйлардаги хонадонларга кўчиб кириш ҳолатлари сақланиб қолмоқда.
Қонун лойиҳаси билан Жиноят кодексига ўзгартишлар киритиш назарда тутилмоқда. Ўзгартиришларга кўра, кўп квартирали уйларни қуришга масъул шахслар, шунингдек, мансабдор шахслар фойдаланишга тайёр бўлмаган объектларда одамларнинг яшашига йўл қўйганлик учун жиноий жавобгарликка тортилиши мумкин.
Бундан ташқари, Шаҳарсозлик кодекси меъёрларини тўлдириш таклиф этилмоқда. Буюртмачи ва пудратчиларга фуқароларни фойдаланишга тайёрлик талабларига жавоб бермайдиган уйларга жойлаштирмаслик чораларини кўриш мажбурияти юклатилади.
Ҳужжат Қонунчилик палатаси депутатлари томонидан қабул қилингач, Сенатга кўриб чиқиш учун юборилди.
Аввалроқ июнь ойидан бошлаб Ўзбекистонда шаҳарсозлик соҳасидаги қоидабузарликлар учун оширилган жарималар амал қила бошлагани хабар қилинганди. Хусусан, объектларни ижобий экспертиза хулосасисиз қурганлик, шунингдек, кўп қаватли уйлардаги юк кўтарувчи конструкцияларни ўзбошимчалик билан ўзгартирганлик учун жавобгарлик кучайтирилди.
Изоҳлар мавжуд емас