Ўзбекистон, Тошкент - Batafsil.uz. Янги Тошкент қурилиши бошланганига уч йил бўлган бўлса-да, тадбиркорларга ҳозиргача атиги 94 гектар ер ажратилган. Айни пайтда шаҳарда бир гектар ернинг ўртача қиймати 19 миллиард сўмга етган. Президент Шавкат Мирзиёев инвесторлар билан мулоқотда хусусий секторни қурилишга жалб қилиш суръатлари мавжуд имкониятларга мос эмаслигини таъкидлади.
Давлат раҳбари 12 октябрь куни Янги Тошкент қурилишини жадаллаштириш масалалари юзасидан инвестор ва тадбиркорлар билан очиқ мулоқот ўтказди. Унда ер ажратиш, рухсат олиш ва тўловлар билан боғлиқ муаммолар, шунингдек, инвестиция лойиҳаларини амалга оширишга тўсқинлик қилаётган омиллар муҳокама қилинди.
Янги Тошкент лойиҳаси доирасида ҳозиргача 2 миллиард доллардан ортиқ инвестиция киритилган. Давлат инфратузилма, стадион, университет ва кутубхона каби муҳим объектлар қурилишига маблағ йўналтирмоқда. Шаҳар учун жами 20 минг гектар ер ажратилган бўлиб, биринчи босқичда 6 минг гектар майдонда 50 миллиард долларлик лойиҳаларни амалга ошириш режалаштирилган. Янги аэропорт қурилиши билан бирга ҳудуднинг инвестиция салоҳиятини 200 миллиард долларгача етказиш мумкинлиги айтилди.
Бироқ ҳозирда минг гектардан ортиқ майдонда асосан давлат маблағлари ҳисобидан қурилиш олиб борилмоқда. Тадбиркорларга эса 94 гектар ер ажратилган. Президентнинг қайд этишича, ажратилган ерларнинг учдан икки қисми уй-жой лойиҳаларига тўғри келмоқда. Шу билан бирга, инвесторларга берилган 28 та лотда қурилиш ишлари ҳали бошланмаган.
Шавкат Мирзиёев бу ҳолатни тадбиркорларда маблағ ёки хоҳиш йўқлиги билан изоҳлаш тўғри эмаслигини таъкидлади. Унинг айтишича, эскича талаблар, чўзилаётган рухсат бериш жараёнлари ва айрим идораларнинг инвесторларга ҳамкор сифатида эмас, назоратчи сифатида ёндашиши лойиҳаларга тўсиқ бўлмоқда.
"Инвестор эса кутмайди. У кўмак ва кафолатни ҳис қилмаса, маблағини бошқа бозорга йўналтиради", — деди Президент.
Шу муносабат билан тадбиркорларга ер ажратишдан тортиб, лойиҳани ишга туширишгача бўлган жараёнларни қайта кўриб чиқиш зарурлиги таъкидланди.
Янги Тошкентда ер нархи ҳам сезиларли даражада ошган. Агар 2024 йилда бир гектар ернинг ўртача қиймати 10 миллиард сўмга етмаган бўлса, ҳозир бу кўрсаткич 19 миллиард сўмни ташкил этмоқда.
Вазирликлар ҳам Янги Тошкентга кўчирилади
Янги шаҳарда ишбилармонлик муҳитини шакллантириш учун давлат идораларини кўчириш ҳам режалаштирилган. Ҳозирда Қурилиш, транспорт ва энергетика вазирликлари енгил конструкцияли биноларда фаолият юритмоқда. Шунингдек, вазирлик ва идораларнинг 2,6 минг нафар ходими учун тўққизта бино қурилмоқда.
Бош вазирга қолган вазирликлар ва давлат ташкилотларини ҳам Янги Тошкентга кўчириш ишларини бошлаш топширилди. Зарур ҳолларда пойтахтдаги мавжуд давлат идоралари биноларини бузиб, қайта қуриш ҳуқуқисиз, жорий таъмирлаш шарти билан сотиш масаласи ҳам кўриб чиқилади.
Президент Янги Тошкент фақат уй-жойлар қуриладиган ҳудуд бўлиб қолмаслиги, балки бизнес, таълим, тиббиёт, туризм ва хизмат кўрсатиш соҳаларини бирлаштирган мустақил иқтисодий марказга айланиши кераклигини таъкидлади.
Изоҳлар мавжуд емас