Ўзбекистон, Тошкент - Batafsil.uz. Ўзбекистон қонунчилигида "диний экстремизм" атамаси "экстремизм" тушунчаси билан алмаштирилади. Бу ҳақда Олий Мажлис Сенатининг 18-ялпи мажлисида экстремизмга қарши курашиш соҳасидаги қонун муҳокамаси давомида маълум қилинди.
Янги қонунга кўра, экстремизм, сепаратизм ёки ақидапарастлик ғоялари билан йўғрилган материалларни тайёрлаш, тарқатиш мақсадида сақлаш, шунингдек, экстремистик ва террорчилик ташкилотлари рамзларини тарқатиш ёки намойиш этиш мақсадида тайёрлаш ва сақлаш биринчи марта содир этилганда маъмурий жавобгарликка сабаб бўлади.
Жиноий жавобгарлик эса бундай қилмиш маъмурий жазодан кейин такроран содир этилган ҳолларда қўлланади. Сенатда таъкидланишича, "диний экстремизм" тушунчасининг ""экстремизм" билан алмаштирилиши экстремизмни муайян дин билан боғлаш амалиётига чек қўйиш ва ягона ҳуқуқий ёндашувни таъминлашга қаратилган.
Шунингдек, экстремизм тушунчасига аниқ саккизта хатти-ҳаракат асосида таъриф берилиши, бу эса ҳуқуқни қўллашда тушунчани субъектив ёки кенгайтирилган тарзда талқин қилишнинг олдини олиши кутилмоқда.
Қонун билан экстремистик ташкилотларни тузиш, уларга раҳбарлик қилиш ва иштирок этиш учун жазолар ҳам табақалаштирилади. Ташкилотда иштирок этганлик учун енгилроқ, уни тузиш ёки раҳбарлик қилиш учун эса оғирроқ жазо белгиланиши назарда тутилмоқда.
Бундан ташқари, экстремистик ташкилотлар ва материалларнинг ягона электрон реестрини юритиш, бу соҳада давлат дастурларини жорий этиш ҳамда экстремизм ҳақида хабар берган шахсларнинг маълумотларини сир сақлаш ва уларни ҳимоя қилиш механизмлари белгиланмоқда.
Қонун Сенат томонидан маъқулланган.
Изоҳлар мавжуд емас