Ўзбекистон, Тошкент - Batafsil.uz. Ўзбекистонда савдо ва хизмат кўрсатиш соҳасини рақамлаштириш ҳамда солиқ маъмуриятчилигини соддалаштиришга қаратилган янги ҳукумат қарори лойиҳаси ишлаб чиқилди. Айни пайтда жамоатчилик муҳокамасида бўлган ушбу ҳужжатда соҳага оид қатор муҳим ўзгартиришлар назарда тутилган.
Лойиҳага кўра, рецепт асосида сотиладиган дори воситалари учун электрон рецепт рақамини касса чекида мажбурий тарзда акс эттириш талаби жорий этилиши мумкин. Бу чора дори воситалари савдосини шаффофлаштириш ва ноқонуний айланмаларнинг олдини олишга хизмат қилади.
Шунингдек, қўшилган қиймат солиғининг салбий фарқ суммасини тезлаштирилган тарзда қоплаш механизми фақат Президент қарори билан тасдиқланган йирик солиқ тўловчилар рўйхатига киритилган компанияларга нисбатан қўлланиши белгиланмоқда.
Қарор лойиҳасида рақамли маркировкага оид айрим жазо чораларини бекор қилиш таклифи ҳам илгари сурилган. Хусусан, қалбаки маркировкаланган ёки контрафакт маҳсулотларни импорт қилиш, ишлаб чиқариш ва сотиш учун жиноий жавобгарликни назарда тутувчи нормани чиқариб ташлаш режалаштирилмоқда.
Ушбу таклиф экспертлар ва бизнес вакиллари орасида кенг муҳокамаларга сабаб бўлмоқда, чунки рақамли маркировка тизими хуфиёна иқтисодиётга қарши асосий воситалардан бири сифатида қаралмоқда.
Ҳукумат таъкидлашича, мазкур ўзгаришлар замонавий ахборот ечимларини кенг жорий этиш ва солиқ тизимини соддалаштиришга қаратилган.
Изоҳлар мавжуд емас