Ўзбекистон, Тошкент - Batafsil.uz. АҚШнинг Жамоат дипломатияси масалалари бўйича давлат котиби ўринбосари Сара Рожерс 27-майдан 10-июнга қадар давом этадиган минтақавий сафари доирасида Ўзбекистонга расмий ташриф билан келади. Ушбу сафардан кўзланган асосий мақсад — икки давлат ўртасидаги гуманитар, таълим, маданий ва ахборот соҳаларидаги ҳамкорлик алоқаларини янада мустаҳкамлашдан иборат.
Ташриф дастурига кўра, томонлар ўртасида оммавий коммуникациялар, жамоатчилик дипломатияси ва минтақавий алоқаларни ривожлантириш истиқболлари муҳокама қилиниши кутилмоқда. Гарчи делегациянинг аниқ учрашувлар режаси ва ташриф буюриладиган манзиллар ҳақида расмий маълумотлар ҳозирча ошкор қилинмаган бўлса-да, бу ташриф икки томонлама муносабатларнинг фаол ривожланиб бораётганидан далолат беради.
Хусусан, жорий йилнинг апрель ойида Вашингтонда Америка-Ўзбекистон ишбилармонлик ва инвестиция кенгашининг ишга туширилиши икки мамлакат ўртасидаги алоқаларни янги босқичга кўтарган. Сўнгги бир йил ичида иқтисодий кўрсаткичлар ҳам сезиларли ўсган: товар айланмаси 25 фоизга ошиб, 2025-йил якунларига кўра 1,2 миллиард доллардан ошган.
Сара Рожерснинг минтақавий сафари Ўзбекистондан ташқари Ҳиндистон, Непал ва Туркманистон давлатларини ҳам қамраб олади.
Изоҳлар мавжуд емас