Ўзбекистон, Тошкент - Batafsil.uz 2026 йилнинг иккинчи чорагида Ўзбекистонда уй-жой нархлари биринчи чоракка нисбатан 1,3 фоизга, ўтган йилнинг мос даврига таққослаганда эса 4 фоизга қимматлашди. Миллий статистика қўмитаси маълумотларига кўра, квартиралар нархи чорак давомида 1,2 фоизга, хусусий ҳовли-жойлар эса 1,4 фоизга ошган.
Энг катта йиллик ўсиш суръатлари пойтахтдан ташқаридаги вилоятларнинг янги қурилган уй-жой (бирламчи) бозорида кузатилиб, у ерда нархлар 8,7 фоизгача кўтарилган. Республика бўйича квартиралар нархи йиллик ҳисобда 5,5 фоизга ўсган.
Бунда янги қурилган уйлар чорак давомида 0,7 фоизга (йиллик 7,1 фоизга), иккиламчи бозордаги квартиралар эса чорак мобайнида 1,6 фоизга (йиллик 4,2 фоизга) қимматлашган. Вилоятларда умумий квартиралар нархи чораклик ҳисобда 1,1 фоизга, йиллик эса 7 фоизга ошган бўлса, у ердаги иккиламчи бозорда йиллик ўсиш 5,1 фоизни ташкил этган.
Тошкент шаҳрида кўчмас мулк нархларининг ўсиши нисбатан секинроқ суръатда давом этмоқда. Пойтахтда квартиралар нархи биринчи чоракка нисбатан 1,3 фоизга, ўтган йилнинг шу даврига нисбатан эса 3,9 фоизга қимматлашган. Тошкентнинг бирламчи бозорида йиллик ўсиш 5 фоизни, иккиламчи бозорида эса 3,2 фоизни ташкил қилган.
Эътиборли жиҳати, пойтахтда ер участкали якка тартибдаги уйлар нархида пасайиш кузатилган. Тошкентда ҳовли-жойлар нархи биринчи чоракка нисбатан 0,7 фоизга арзонлашган бўлса, республиканинг бошқа ҳудудларида аксинча, 2,8 фоизга қимматлашган. Йиллик ҳисобда хусусий уйлар нархи пойтахтда 1,2 фоиз, вилоятларда эса 2,7 фоизлик ўсишни қайд этган.
Изоҳлар мавжуд емас