Ўзбекистон, Тошкент - Batafsil.uz. Тошкент вилоятининг Зангиота туманида ҳуқуқ-тартибот идоралари ходимлари ва қутқарувчилар томонидан юз бериши мумкин бўлган фожианинг олди олинди. Баландликка чиқиб қолган ва савдо мажмуасининг 10-қаватидан сакрамоқчи бўлган эркакни бинодан хавфсиз туширишга муваффақ бўлинди.
Воқеа жойидан олинган видео аввалроқ ижтимоий тармоқларда тарқалган эди. Кадрларда эркакнинг баландликда эканлиги ва кўп қаватли бинодан сакраш ниятида эканлиги акс этган.
Вилоят ИИББ хабарига кўра, ҳодиса 14 июнь куни соат 22:20 атрофида содир бўлган. Хабар келиб тушгач, туман ички ишлар бўлими, прокуратура ва фавқулодда вазиятлар бўлинмалари ходимлари воқеа жойига етиб борган.
Мутахассислар эркак билан алоқа ўрнатиб, уни машъум қадамдан воз кечишга кўндиришди. У савдо мажмуасининг 10-қаватидан жароҳатларсиз ва шикастларсиз олиб ташланган.
Кейинчалик маълум бўлишича, қутқариб олинган шахс Қашқадарё вилояти Чироқчи тумани "Чамбил" маҳалласида яшовчи 36 ёшли фуқаро бўлган. Ҳуқуқ-тартибот идоралари маълумотларига кўра, эркак руҳий-асаб касалликлари диспансерида рўйхатда туради.
Ҳолат юзасидан тегишли ҳужжатлар расмийлаштирилди. Ҳозирда эркак зарур ёрдам олиш учун ихтисослаштирилган тиббиёт муассасасига юборилган.
Аввалроқ Фарғона вилоятида экоинспекторлар вояга етмаган қизни ўз жонига қасд қилишдан қутқариб қолганди.
Изоҳлар мавжуд емас