Ўзбекистон, Тошкент - Batafsil.uz. Ўзбекистон 40 миллионга яқин аҳолисининг турмуш даражасини ошириш учун иқтисодий ўсишни 9−10 фоиз даражасида таъминлаши керак. Бу ҳақда мамлакат президенти ҳудудлар ва тармоқлардаги иқтисодий ўсиш суръатлари таҳлилига бағишланган видеоселектор йиғилишида айтиб ўтди.
Давлат раҳбари иқтисодиёт юқори суръатлар билан ривожланаётган бўлса-да, ҳозирги кўрсаткичлар аҳоли фаровонлигини янада ошириш учун етарли эмаслигини таъкидлади. Унинг сўзларига кўра, дунёдаги тез ўзгарувчан вазиятда ҳар бир раҳбар янги захираларни излаши, қўшимча ривожланиш сценарийларини ишлаб чиқиши ва бажарилган ишлар тўғрисидаги ҳисоботлар билан чекланиб қолмаслиги керак.
Шу боис йиғилишда вазирлик ва ҳудудлар томонидан ярим йиллик режалар ижроси танқидий таҳлил қилинди. Президент айрим вилоятларда ялпи ҳудудий маҳсулотни ўстириш, қурилиш ва инвестицияларни жалб қилиш салоҳияти тўлиқ ишга солинмаганини таъкидлади.
Шунингдек, раҳбарлар фаолиятига фақат статистик кўрсаткичлар билан эмас, балки одамлар ҳаётидаги реал ўзгаришлар ва бизнес юритиш шароитлари билан баҳо бериш кераклигини таъкидлади. Агар вазирлик ва ҳокимликлар фаолияти аҳоли турмуш сифатини яхшиламаса, тадбиркорлар ишини енгиллаштирмаса, бундай натижалар "қоғоздаги рақамлар" бўлиб қолаверади.
Президент сўзининг якунида "ҳозирги шароитда ойлик, чораклик ёки йиллик режаларни бажармаган бирорта вазир, ҳоким ёки тармоқ раҳбари хотиржам ишлашга ҳақли эмас"лигини таъкидлади.
Изоҳлар мавжуд емас