Ўзбекистон, Тошкент - Batafsil.uz. Навоий вилоятида ўзини ички ишлар ходими сифатида кўрсатган ва аёлни шантаж қилган фуқаро қўлга олинди.
Бу ҳақда Навоий вилояти ички ишлар органлари маълум қилди.
Маълумотларга кўра, сурхондарёлик 25 ёшли йигит ижтимоий тармоқ орқали навоийлик аёл билан танишиб, ишқий муносабат ўрнатган. Орадан кўп ўтмай у аёлнинг ишончига кириб, шахсий фото ва видеоларини қўлга киритган. Кейинчалик йигит ўзини ички ишлар ходими деб таништириб, унинг суратларини тармоқларда тарқатиш билан таҳдид қилган ва аёлдан пул талаб қилган.
Аёл дастлаб унга 600 ва 250 минг сўмни банк картаси орқали жўнатган. Аммо товламачи аёлнинг ишончидан фойдаланиб, яна пул талаб қилишни давом эттирган.
Аёлнинг сўзларига кўра, у йигит билан 2025 йил август ойида танишган, расм сўраганда, ташламайман десам ҳам мажбурлаган. Скриншот қилмаслигини айтган эди, аммо кейин охирги расмини скриншот қилиб, пул бермасанг, тарқатаман деб қўрқитган.
Навоий ИИБ шахсий хавфсизлик бўлими ва Жиноят қидирув бошқармаси ходимлари томонидан тезкор тадбир ташкил этилиб, товламачиликда гумон қилинган шахс қўлга олинган. У терговда қилган ишларини тан олган ва қилмишидан пушаймонлигини билдирган:
"Ҳеч ким билмайди, ҳеч ким тополмайди деб ўйлагандим. Қилган ишимдан пушаймонман", — дейди гумонланувчи.
Ҳозирда мазкур ҳолат юзасидан Жиноят кодексининг 165-моддаси (товламачилик) билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, ўзбекистонлик аёл ўзини Шойгунинг қариндоши деб таништириб, москваликларни юз миллионлаб пулга чув туширган эди.
Изоҳлар мавжуд емас