Ўзбекистон, Тошкент - Batafsil.uz. Денов туманида аёлнинг бузилган турар жой масаласи вилоят ҳокими назоратига олинди. Фуқаронинг уй-жой билан боғлиқ муаммосини ҳал этиш мақсадида унга янги турар жой қуриб берилиши маълум қилинди.
Ижтимоий тармоқларда Денов туманида фуқаронинг уй-жойи бузилгани билан боғлиқ турли хабарлар тарқалган эди. Мажбурий ижро бюросининг Сурхондарё вилояти бошқармаси ҳолат юзасидан расмий муносабат билдириб, амалга оширилган ижро ҳаракатлари суд ҳужжати асосида олиб борилганини маълум қилган.
Ўрганишлар давомида фуқаронинг кадастр ҳужжатлари мавжуд бўлган қонуний ер майдонига туташ ҳудудда, фермер хўжалигининг дала майдонида уй-жой қурилгани аниқланган.
Мулоқот давомида фуқарога ер майдонини тегишли ҳужжатларсиз ўзлаштиргани ва қонун талабларини бузгани тушунтирилган. Шу билан бирга, ернинг тоифасини ўзгартириш масаласида вилоят ҳокимининг ҳам ваколати мавжуд эмаслиги таъкидланган.
Вилоят ҳокими фуқарога қонуний тартибда ер майдони топиш ва уни аукцион орқали расмийлаштириш бўйича амалий ёрдам кўрсатилишини билдирган. Шунингдек, оиланинг уй-жой шароитини яхшилаш учун янги уй қуриш ишларига кўмаклашиш бўйича тегишли топшириқлар берилган.
Фуқаронинг оила аъзоларига ижтимоий ва тиббий ёрдам кўрсатиш, жумладан, оиладаги беморни даволатиш ҳамда фарзандларига психологик кўмак бериш масалалари ҳам назоратга олинган.
Мажбурий ижро бюроси маълумотига кўра, амалга оширилган ижро ҳаракатлари суд қарори асосида бажарилган. Шу билан бирга, фуқаронинг манфаатларини таъминлаш ва уни уй-жой билан таъминлаш масаласи вилоят ҳокими томонидан шахсан назорат қилинмоқда.
Масала фуқаронинг уй-жой муаммосини ҳал этиш, унинг ҳуқуқ ва манфаатларини таъминлаш ҳамда қонунчилик талабларига риоя этилишини таъминлаш нуқтаи назаридан назоратда қолади.
Изоҳлар мавжуд емас