Ўзбекистон, Тошкент - Batafsil.uz. Фарғона вилоятида ички ишлар органлари томонидан одам савдоси билан боғлиқ навбатдаги жиноятнинг олди олинди. Уюшган жиноятчиликка қарши курашиш бошқармаси ходимлари 18 ёшли қизни Туркияга жинсий эксплуатация қилиш мақсадида юборишга уринган шахсларни қўлга олди.
Тергов маълумотларига кўра, жиноий схема ташкилотчиси Қува туманида яшаган, айни пайтда Туркиянинг Денизли шаҳрида бўлган аёл эканлиги аниқланган. У ўз шериги билан биргаликда ёш қизларни алдаш йўли билан Туркияда "юқори маошли ва енгил иш" борлигига ишонтириб, уларни мамлакатдан чиқариб юборишга ҳаракат қилган.
Ушбу жиноий гуруҳнинг навбатдаги қурбони 18 ёшли фарғоналик қиз бўлган. Жиноятчилар унга қисқа вақт ичида катта миқдорда даромад топишни ваъда қилиб, алдаб олишган. Бироқ, тезкор-қидирув тадбирлари давомида уюшган жиноятчиликка ва одам савдосига қарши курашиш бўлинмалари ходимлари томонидан жиноий режанинг олди олинган.
Гумондор шахслар ҳуқуқ-тартибот идоралари томонидан қўлга олинган. Ҳозирда уларга нисбатан Ўзбекистон Республикаси Жиноят кодексининг одам савдоси билан боғлиқ моддалари бўйича жиноят иши қўзғатилиб, тергов ҳаракатлари олиб борилмоқда.
Ҳуқуқни муҳофаза қилувчи органлар фуқароларни, айниқса ёшларни чет элдаги шубҳали иш таклифларига нисбатан ҳушёр бўлишга ва алдов қурбонига айланиб қолмасликка чақирмоқда.
Изоҳлар мавжуд емас