Ўзбекистон, Тошкент - Batafsil.uz. Шахзода Мухамедова Imarat қурилиш компанияси атрофидаги можарода таъсисчилар ва шериклар ўртасидаги келишмовчиликлар акс этган иккинчи аудиосуҳбатни тарқатди. Унда Жасур Азизов компания билан боғлиқ лойиҳалардан чиқиб кетишга тайёрлигини, қарзлар ва молиявий муаммолардан чарчаганини айтган. Компания билан боғлиқ лойиҳаларда улуши бор Марат Ҳайруллаевич эса янги кредитлар олинишига қарши чиқиб, қурилиш учун аввал тўланган маблағлар сарфланиши кераклигини билдирган.
Аудиосуҳбатда Жасур Азизов бир неча бор компаниядаги улушини сотиб, ишдан кетишга тайёрлигини таъкидлаган. Унинг айтишича, ҳозир қўлида етарли нақд пул йўқ, солиқ органларидан текширувлар бўйича учта хат олган. Шунингдек, у қарзларини тўлаш учун Дубайдаги икки-учта уйини ҳам сотиши мумкинлигини айтган.
Азизов суҳбатдошига компаниядаги улушини сотиб олиш бўйича жиддий таклиф бўлса, келишишга тайёрлигини билдирган. Унинг таъкидлашича, икки йилдан бери давом этаётган муаммолар сабабли тинчлиги ва соғлиғига путур етган.
Суҳбатнинг бошқа қисмида Марат Ҳайруллаевич компанияга алоқадор объектлар учун янги кредитлар олинишига қатъий қарши эканини айтган. Унинг сўзларига кўра, ҳар бир лойиҳа учун харидорлар етарлича маблағ тўлаган ва қурилиш ишлари шу пуллар ҳисобидан давом эттирилиши керак.
У учта лойиҳа бўйича аввалги кредитларни тўлашда иштирок этганини билдирган. Марат Ҳайруллаевич айрим ер участкалари қийматидан қимматроққа сотилгани ва бунинг учун ҳам кредит тўлашга тўғри келганини айтган. У ўз номига алоқадор компаниялардан бирортаси янги кредит олса, бу ҳақда харидорларни огоҳлантиришини ҳам маълум қилган.
Марат Ҳайруллаевич Тузел Парк лойиҳасига Жаҳонгир исмли янги инвестор жалб қилинаётганидан ҳам норози бўлган. Унинг айтишича, мазкур шахснинг Қаршидаги учта лойиҳасида қурилиш ишлари бажарилмаган, икки йил давомида бинолардан бирининг ҳатто биринчи қавати ҳам қурилмаган. У инвесторнинг молиявий имкониятларини текшириш, аввалги ишчилар ва қурувчилар олдидаги қарзларни тўлаш зарурлигини таъкидлаган.
Шу билан бирга, Жасур Азизов суҳбатда компания ҳужжатларида ўз номи тургани учун қурилиш ишлари бажарилмай қолса, биринчи навбатда ўзи жавобгар бўлишини айтган. Унинг таъкидлашича, компания ҳисобларига тушган маблағлар қаерга сарфлангани бўйича ҳар бир иштирокчи ҳисоб бериши керак. Азизов ҳеч кимнинг ҳаққини емаганини ва лойиҳалардаги масъулиятдан қочмаслигини билдирган.
Можаро Шаҳзода Муҳамедованинг айбловларидан кейин янада кескинлашди.
Эслатиб ўтамиз, аввалроқ Imarat уйлари рекламаларида фаол иштирок этган Шаҳзода Муҳамедова Жасур Азизовни компания маблағларини ўзлаштиришда айблаган эди. Унинг айтишича, Азизов компания маблағлари ҳисобидан Лондонда турмуш ўртоғи номига 12 миллион долларлик кўчмас мулк сотиб олган.
Муҳамедова, шунингдек, Азизов бухгалтер билан тил бириктиргани, компания номини ўзгартириб, давлатдан кредит олишни режалаштиргани ва Интерпол томонидан хорижга чиқишга уринаётганида қўлга олинганини билдирган. Актриса барча уйлар харидорларга топширилиши ёки уларнинг пуллари қайтарилишини айтган. Унинг таъкидлашича, ўзи ҳам ушбу можарода жабрланувчи ҳисобланади ва далилларни судга тақдим этган.
Изоҳлар мавжуд емас