Ўзбекистон, Тошкент - Batafsil.uz. Исроилнинг БМТдаги доимий вакили Дэнни Данон Эронга қарши ҳарбий операцияни бошлаш қарори Вашингтон томонидан қабул қилинганини таъкидлади. У АҚШдаги оралиқ сайловларда республикачиларнинг мағлубиятини Исроил билан муносабатларга боғлашга уринишларга эътироз билдирди.
Хорижий нашрларга берган интервьюсида АҚШ вице-президенти Жей Ди Вэнснинг Эрон билан уруш ва Исроил билан муносабатлар ҳақидаги фикрларига муносабат билдирган ва Исроилни айблаш осон, аммо Эронга ҳужум қилиш тўғрисидаги қарорни Исроил эмас, АҚШнинг ўзи қабул қилган деб айтган.
Данон америкалик сайловчилар орасида нефть нархининг ошиши Исроил билан боғланаётганидан афсусда эканини айтган. Унинг таъкидлашича, Исроил АҚШнинг ҳаракатларини қўллаб-қувватлаган ва бу қарор тўғри бўлган, деб ҳисоблайди.
Биньямин Нетаньяху урушдан бир неча ҳафта олдин Дональд Трампга Эрондаги аҳоли ҳужумдан кейин ҳукуматга қарши қўзғалиб, амалдаги режимни ағдариши мумкинлиги ҳақида разведка маълумотларини тақдим этган. Бироқ ҳарбий амалиёт натижасида Эронда ҳокимият алмашмаган. Аксинча, мамлакат стратегик аҳамиятга эга Ҳўрмуз бўғози устидан назоратини кучайтирган. Бу эса энергия нархининг кескин кўтарилишига олиб келган.
АҚШда яшаш харажатларининг ошиши сайловчиларни ташвишга солган асосий масалалардан бири бўлган.
Демократлар партияси сайловолди кампаниясида айнан шу муаммодан фойдаланган. Республикачиларнинг Конгресснинг ҳар икки палатасидаги йўқотишлари эса мамлакатнинг ташқи сиёсати, хусусан, Исроил билан муносабатлари юзасидан баҳсларни янада кучайтирган.
Исроилнинг ўзида ҳам АҚШдаги сайлов натижалари ва Нетаньяху ҳукуматининг Вашингтон билан муносабатлари муҳокамаларга сабаб бўлган. Айрим исроиллик сиёсатчилар ва шарҳловчилар бош вазирни танқид қилиб, унинг АҚШдаги икки асосий партия учун ҳам "муаммоли шахс"га айланиб бораётганини таъкидлашган.
Исроилнинг собиқ дипломати эса АҚШдаги сайлов натижаларини икки мамлакат ўртасидаги ярим асрлик муносабатлар даврининг якуни сифатида баҳолаб, келгусидаги ҳамкорлик қандай тус олиши ҳозирча ноаниқ эканини билдирган.
Аввалроқ АҚШ ва Исроил 3 ноябрда ўтказиладиган оралиқ сайловлардан сўнг Эронга қарши янги ҳарбий амалиётларни бошлаш бўйича режаларни ишлаб чиққани ҳақида хабар берилганди.
Изоҳлар мавжуд емас