Ўзбекистон, Тошкент - Batafsil.uz. Навоийда хусусий боғча тарбиячиси бир ёшдан уч ёшгача бўлган камида беш нафар болага нисбатан зўравонлик қилгани учун 3 йил 3 ойга озодликдан маҳрум қилинди. Суд унга яна икки йил давомида мактабгача таълим муассасаларида тарбиячи бўлиб ишлашни тақиқлади.
Суд материалларига кўра, аёл 2025 йил декабридан 2026 йил апрелигача хусусий боғчада тарбиячи бўлиб ишлаган. У шу даврда бир нечта кичик ёшдаги болаларга нисбатан жисмоний куч ишлатган.
Зўравонлик ҳолати 7 апрель куни аниқланган. Тарбиячининг янги ёрдамчиси унинг болаларни ургани, итаргани ва тепганини телефонга тасвирга олган. Кейинроқ ушбу видеолар тарқалиши ортидан болаларнинг ота-оналари ҳам уларнинг хулқ-атворида ўзгаришлар пайдо бўлганини айтган.
Айрим болалар боғчага боришни истамай қўйган, йиғлаган ва қўрқув ҳолати кузатилган. Болалардан бирини доимий йиғлаши сабабли невролог кўригидан ўтказишга тўғри келган.
Психологик экспертизада эса болаларда оғир руҳий жароҳат реакцияси, қўрқув ва тарбиячининг жисмоний зўравонлиги билан боғлиқ кечинмалар аломатлари аниқланган.
Судда тарбиячи айбини қисман тан олган. У болаларга нисбатан куч ишлатганини тасдиқлаган, аммо бу мунтазам равишда содир бўлмаганини билдирган.
Суд уни Жиноят кодексининг 110-моддаси — "Қийнаш" бўйича айбдор деб топган. Унга 3 йил 3 ойлик озодликдан маҳрум қилиш жазосидан ташқари, икки йил муддатга мактабгача таълим муассасаларида тарбиячи бўлиб ишлаш тақиқланган.
Аввалроқ ижтимоий тармоқларда Наманган вилояти Учқўрғон туманидаги давлат мактабгача таълим ташкилотларидан бирида беш ёшли болага нисбатан жинсий зўравонлик содир этилгани ҳақида хабарлар тарқалганди.
Изоҳлар мавжуд емас