Ўзбекистон, Тошкент - Batafsil.uz. АҚШ ва Эрон вакиллари июнь ойи охиридан бери илк бор Нью-Йоркда музокара ўтказди. Учрашув БМТ Бош ассамблеяси доирасида бўлиб ўтган, АҚШ президенти Дональд Трамп эса Теҳрон билан келишувга 3 ноябрь куни АҚШ Конгрессига бўлиб ўтадиган оралиқ сайловлардан кейин эришиш мумкинлигини айтди.
Музокараларда АҚШ томонидан Трампнинг махсус вакиллари Стив Уиткофф ва Жаред Кушнер, Эрон томонидан эса ташқи ишлар вазири Аббос Арағчи иштирок этган. Учрашув Нью-Йоркда воситачилар иштирокида ўтказилган ва бир неча соат давом этган. Уиткофф музокаралар якунланганини маълум қилган.
Трамп БМТ Бош ассамблеясидаги нутқида Вашингтон ва Теҳрон ўртасида келишув тузилишига умид қилаётганини айтган. Унинг фикрича, Эрон томони АҚШдаги оралиқ сайловлар натижаларини кутаётган бўлиши мумкин. Президент шу билан бирга Вашингтон олдида Эрон билан келишув тузиш ёки унга нисбатан ҳарбий босимни давом эттириш масаласи турганини билдирган.
Музокаралар Эрон ва АҚШ ўртасидаги кескинлик кучайган бир пайтда ўтказилди. Эрон томони эса АҚШ ҳарбий босимни камайтирса ва Эрон портларига қўйилган блокадани бекор қилса, Ҳурмуз бўғозини очишга тайёрлигини билдирган.
Трамп БМТдаги нутқида Россия ва Украина ўртасидаги уруш бўйича ҳам келишувга тез орада эришилиши мумкинлигини айтган, аммо аниқ муддат келтирмаган.
Шунингдек, АҚШ президенти Кубага нисбатан босимни кучайтириш ва мамлакатда "туб ўзгаришлар"га эришиш мақсадида ҳаракат қилинаётганини билдирди. Унинг нутқи вақтида Куба делегацияси БМТ Бош ассамблеяси залини тарк этган.
Трамп, шунингдек, АҚШнинг Гренландиядаги мавжудлигини таъминлаш бўйича келишув имзоланганини маълум қилди. Унинг айтишича, бу ҳужжат АҚШ, Дания ва Гренландия ўртасидаги муносабатларни барқарорлаштиришга хизмат қилади.
Президент сунъий интеллект масаласига тўхталиб, АҚШ ушбу технология ривожини чеклаш ниятида эмаслигини айтган. У энг кучли сунъий интеллект тизимларини ифодалаш учун "суперинтеллект" атамасидан фойдаланишни таклиф қилган.
Изоҳлар мавжуд емас