Ўзбекистон, Тошкент - Batafsil.uz. Сирдарё вилояти суди Ўзбекистон фуқаросини Украинадаги жанговар ҳаракатларда қатнашгани учун уч йилга озодликни чеклаш жазосига ҳукм қилди. Эркак миграция қоидаларини бузганлик учун жавобгарликдан қўрқиб, Россия Мудофаа вазирлиги билан шартнома имзолаган.
Суд қарори таҳририятимиз ихтиёрида мавжуд.
Иш материалларига кўра, 2024 йил декабрь ойида эркак Россияга пул ишлаш мақсадида кетган. Бироз вақт ўтгач, у мамлакат ҳудудида ноқонуний юргани учун полиция ходимлари томонидан қўлга олинган. У жиноий жавобгарликка тортилиш ва депортация қилинишдан қўрқиб, ҳарбий хизматни ўташ учун шартнома тузиб қўйган.
2025 йил апрель ойида фуқаро Мудофаа вазирлигининг ҳарбий қисмларидан бирига қабул қилинган ва Украина ҳудудидаги жанговар ҳаракатлар зонасига юборилган. Унга қурол-яроғ, ҳарбий анжомлар ва алоқа воситалари берилган. Жанговар ҳаракатлар давомида у позицияларни ушлаб туриш, ҳудудни муҳандислик жиҳозлаш, ҳалок бўлганларнинг жасадларини йиғиш вазифаларини бажарган, шунингдек, отишмаларда қатнашган.
Эркак олган жароҳати натижасида Россия ҳудудидаги ҳарбий госпиталларда даволанган. 2025 йил июль ойида у Ўзбекистонга қайтиб келган ва у ерда ҳуқуқ-тартибот идоралари томонидан қўлга олинган.
Айбланувчининг уяли алоқа воситаси кўздан кечирилганда, унинг жанговар ҳаракатларда иштирок этгани ва хорижий давлатлар қуролли кучлари таркибида бўлганини тасдиқловчи фото ва видеоматериаллар аниқланган.
Суд мажлисида эркак ўз айбига тўлиқ иқрор бўлиб, қилган ишидан пушаймонлигини билдирган. Суд унинг ҳаракатларини Ўзбекистон Жиноят кодексининг 154-моддаси 1-қисми ("Ёлланиш") билан малакалаб, бир қатор чекловларни белгилаган ҳолда уч йил муддатга озодликни чеклаш жазосини тайинлади.
Изоҳлар мавжуд емас