Ўзбекистон, Тошкент - Batafsil.uz. Ўзбекистонда хорижий фуқаролар ва фуқаролиги бўлмаган шахсларни вақтинчалик ҳисобга олмасдан қабул қилаётган меҳмонхона ва даволаш муассасалари учун маъмурий жавобгарликни янада кучайтириш режалаштирилмоқда.
Қонунчилик палатасининг 22-июль кунги ялпи мажлисида муҳокама қилинган мазкур қонун лойиҳаси мамлакатга келаётган сайёҳлар оқимининг кескин ўсгани фонида юзага келмоқда. Ички ишлар вазири ўринбосари Диёрбек Сатторовнинг маълум қилишича, 2026 йилнинг биринчи беш ойида хорижий сайёҳлар сони 27 фоизга ошиб, 5,5 миллион нафарга етган.
Ҳозирда 80 дан ортиқ давлат фуқаролари учун визасиз режим амал қилиши ва электрон виза тизими жорий этилишига қарамай, айрим меҳмонхоналар, хостеллар, санаториялар ва даволаш муассасалари чет элликларни E-mehmon тизими орқали вақтинчалик рўйхатдан ўтказмасдан жойлаштираётгани аниқланган.
Бундай қоидабузарликлар чет элликларнинг қаерда яшаётганини аниқлашни қийинлаштириб, айрим субъектларга солиқдан қочиш ва яширин иқтисодиётни кенгайтириш имконини бермоқда.
Шу боис, Маъмурий жавобгарлик тўғрисидаги кодекснинг 225-моддасига янги ўзгартиришлар киритилиб, мансабдор шахслар учун махсус жавобгарликни белгилаш, ҳуқуқбузарлик такроран содир этилганда ёки ҳужжатсиз шахслар жойлаштирилганда жазони оғирлаштириш кўзда тутилган. Бундай ишларни кўриб чиқиш ваколати эса ички ишлар органларига берилади.
Қолаверса, лойиҳа доирасида амалдаги 24 та қонунга техникавий ўзгартиришлар киритилиб, "доимий яшаш жойи" ва "вақтинчалик яшаш жойи" атамалари "яшаш жойи" ва "турган жойи" тушунчалари билан алмаштирилиб, ягона терминологияга мослаштирилади.
Изоҳлар мавжуд емас