Ўзбекистон, Тошкент - Batafsil.uz. Тошкентда мактаб ҳожатхонасида магнитли билагузукни ютишга мажбур қилинган учинчи синф ўқувчисининг онаси воқеага оид янги тафсилотларни маълум қилди. Унинг айтишича, ҳодисадан кейин юқори синфда ўқийдиган икки нафар ўқувчи болани содир бўлган воқеа ҳақида гапирмасликка мажбурлаб, унга таҳдид қилган.
Аёл янги видеомурожаатида ўғли реанимациядан оддий палатага ўтказилгани ва ҳозир реабилитация жараёнини бошлаганини айтган. Боласи ундан бу ишни қилганлар топилган-топилмаганини сўраган ва "Нега айнан мен?" деган саволни берган.
Онаси билдиришича, воқеа дарс вақтида содир бўлган. Бола ҳожатхонага чиқишга рухсат сўраган ва у ерда икки нафар юқори синф ўқувчисига дуч келган. Унинг айтишича, болалардан бири уни орқасидан ушлаб турган, иккинчиси эса оғзини очиб, металл билагузукни бармоқлари билан томоғига тиққан.
Шундан сўнг юқори синф ўқувчилари болага бу ҳақда кимгадир айтса, эртаси куни юзини кесиб ташлашлари билан таҳдид қилган. Бола дарсга қайтгач, қаттиқ қўрққан. Онаси ўғли доска олдида жавоб бераётганда дудуқлана бошлаганига қарамай, ўқитувчи унинг ҳолатига эътибор бермаганини таъкидлаган.
Уйга қайтганидан кейин боланинг қорни оғриган ва шундан сўнг у шифохонага ётқизилиб, операция қилинган.
Боланинг онаси воқеа бўйича аввал тарқатилган айрим маълумотларга ҳам қўшилмаслигини айтган. Хусусан, унинг фикрича, ўғли билагузукни мустақил равишда ютиб юборган бўлиши мумкин эмас.
Аёлнинг таъкидлашича, воқеа содир бўлган вақтда мактаб янги ўқув йилига тўлиқ тайёр бўлмаган. Унинг сўзларига кўра, юқори синф ўқувчилари кичик синфлар учун мўлжалланган бино ичида парта ва ўқув жиҳозларини кўчириш ишларида иштирок этган.
Онаси мактаб маъмурияти воқеа ҳақида хабар топганидан кейин ҳам дарҳол ёрдам кўрсатмаганини билдирган. У тарқатилган маълумотларнинг айримлари воқеага алоқадор шахсларнинг жавобгарлигини камайтиришга уриниш бўлиши мумкинлигини айтган. Бироқ аёл аниқ далилларсиз муайян шахсларни айблашни истамаслигини ҳам таъкидлаган.
У адвокати билан биргаликда ўғлига зарар етказган деб ҳисоблаётган ўқувчилар ва уларнинг ота-оналарини аниқлаш ниятида. Шунингдек, у мактабларда бундай зўравонлик ҳолатларига йўл қўйилмаслиги учун чора кўрилишини талаб қилишини маълум қилган.
Изоҳлар мавжуд емас