Ўзбекистон, Тошкент - Batafsil.uz. Ижтимоий тармоқларда Тошкентда ота вояга етмаган икки нафар қизига нисбатан жинсий зўравонлик содир этгани ҳақидаги хабарлар тарқалди. Она прокуратурага ариза берган. Бу бўйича дастлабки тергов ҳаракатлари давом этмоқда. Болалар омбудсмани вакили Дилноза Юсупова Batafsil.uz мухбирига иш юритувида болаларнинг ҳуқуқ ва манфаатлари таъминланишини кузатиб бораётганини маълум қилди.
Унинг таъкидлашича, омбудсман мазкур жиноят ишида болалар манфаатларига риоя этилиши юзасидан ўз кузатувини олиб бормоқда.
Ижтимоий тармоқларда тарқалган мурожаатда икки нафар вояга етмаган қизининг онаси турмуш ўртоғи фарзандларига нисбатан жинсий зўравонлик қилганликда гумонланаётганини билдирган. Аёлнинг айтишича, у бу ҳақда 2024 йил 25 июль куни хабар топган.
Шунингдек, мурожаат муаллифи оилада содир бўлган ҳолат ҳақида бир муддат очиқ гапира олмаганини, кейин эса бошқа болалар ҳам бундай вазиятларда сукут сақламаслиги учун жамоатчиликка мурожаат қилишга қарор қилганини айтган.
Мурожаатда ушбу ҳолат юзасидан Тошкент шаҳар прокуратураси иш олиб бораётгани ҳам қайд этилган.
Ҳозирда жиноят иши бўйича дастлабки тергов ҳаракатлари давом этмоқда. Ҳолатга ҳуқуқий баҳо бериш ва ишнинг барча тафсилотларини аниқлаш тергов жараёнида амалга оширилади.
Болалар омбудсмани эса иш юритувида вояга етмаганларнинг ҳуқуқ ва қонуний манфаатлари таъминланишини кузатиб бормоқда.
Изоҳлар мавжуд емас