Ўзбекистон, Тошкент - Batafsil.uz. Тошкент шаҳрининг Бектемир туманида жойлашган "Қўйлиқ" деҳқон бозорида ёнғин хавфсизлиги талабларининг қўпол равишда бузилгани аниқлангани сабабли бозорнинг бир қисми электр таъминотидан узилган ва фаолияти қисман чекланган.
Расмий хабарга кўра, давлат ёнғин назорати томонидан ўтказилган текширувлар давомида бозор ҳудудида ёнғин хавфсизлиги талаблари қўпол равишда бузилгани аниқланган. Мавжуд камчиликлар ёнғин келиб чиқиши ҳамда фуқароларнинг ҳаёти ва мол-мулкига хавф туғдириши мумкинлиги сабабли, эҳтимолий кўнгилсизликларнинг олдини олиш мақсадида ушбу мажбурий чора қўлланилган.
Шунингдек, бозор маъмурияти аниқланган барча камчиликларни тўлиқ бартараф этганидан сўнг электр таъминоти қайта тикланишини ва бозор ўз фаолиятини аввалгидек давом эттиришини маълум қилган. ФВББ томонидан ёнғин хавфсизлиги қоидаларига риоя этилиши юзасидан назорат тадбирлари бошқа бозорлар ва объектларда ҳам давом эттирилиши маълум қилинган.
Изоҳлар мавжуд емас