Ўзбекистон, Тошкент - Batafsil.uz. Тошкент шаҳрида Izmir Art Stroy қурилиш компанияси томонидан барпо этилаётган Neon Towe", Kelajak uylari каби бир нечта йирик турар жой мажмуалари атрофида жиддий келишмовчиликлар ва оммавий норозиликлар юзага келди. Жабрланган харидорларнинг маълум қилишича, 1 500 дан ортиқ фуқаро ўзлари ажратган маблағларига қарамай, ваъда қилинган хонадонларига кира олмай сарсон бўлмоқда.
Асосий эътирозлар қурилиш ишларининг муддатидан ўтиб кетгани ва шартнома шартлари сурункали равишда бузиб келинаётгани билан боғлиқ. Харидорларнинг кўпчилиги уй қийматининг 100 фоиз тўловини амалга оширган. Шартномага мувофиқ, хонадонлар 2024 йилнинг биринчи ёки охирги чорагида то топширилиши лозим эди.
Бироқ белгиланган вақт ўтган бўлса-да, объектларда қурилиш жараёнлари деярли тўхтаб қолган ва топшириш муддатлари қайта-қайта кейинга сурилган. Компания раҳбарияти олдинроқ берган интервьюларида қурилишни 2025 йилнинг охиригача тўлиқ якунлашга ваъда берган бўлса, кейинчалик бу муддат 2026 йилгача сурилиши айтилган.
Бундан ташқари, ҳужжатлар ва объектлар тақсимотидаги чалкашликлар муаммони янада мураккаблаштирган. Бир оилавий ёки якка тартибдаги объект учун турли харидорларга турли хил муддатлар кўрсатилган шартномалар берилгани аниқланган. Энг ёмони, турар жой мажмуаларидаги блоклар (A, B, V, G) ва хонадон майдонлари чалкашиб кетгани сабабли, кўплаб харидорлар ўзлари пул тўлаган аниқ қайси хонадон уларга тегишли эканини ажрата олмай овора бўлишмоқда.
Айрим фуқаролар ўз ҳисобларидан таъмирлаш ишларини бошлаб қўйган бўлса-да, кейинчалик уларнинг хонадонлари бошқа блок ёки бошқа шахсга тегишли бўлиб чиқаётган ҳолатлар кузатилган.
Компания вакиллари юзага келган кечикишларни молиявий тақчиллик, назорат органларининг текширувлари ҳамда 50 га яқин харидор билан шартномалар бекор қилиниб, уларга маблағлар қайтарилгани билан изоҳлашга уринган. Шунингдек, айрим харидорлар ҳам қурилиш тўхтаб қолгани сабабли кейинги тўловларни амалга оширмаётгани айтиб ўтилган. Бироқ фуқаролар компаниянинг жуда катта миқдордаги қарздорлиги мавжудлиги ва маблағлар нотўғри бошқарилганини таъкидлашмоқда.
Вазиятнинг кескинлашуви ортидан давлат масъуллари аралашишга мажбур бўлган. Тошкент шаҳар прокурори Ўрмонов ва Яшнобод тумани ҳокимлиги вакиллари норози бўлган фуқаролар билан учрашувлар ўтказиб, вазиятни ва қурилишнинг боришини ўз назоратига олганини маълум қилишган.
15 сентябрь куни ўтказилган навбатдаги муҳим учрашувда жабрланган фуқароларга янги қурувчи таништирилган. Янги қурувчига ва масъулларга бир ҳафта муддат берилган. Ушбу вақт давомида қанча фуқаро пул тўлагани, қанчаси қарздорлиги, қайси объектга қачон пойдевор қўйилиши ва қаватлар қачон битиши бўйича аниқ график тузиб чиқилиши келишиб олинган. Томонлар кейинги учрашувда аниқ таклифлар ва қурилиш режаси билан аҳолига ижобий ечим тақдим этилишига умид билдирмоқда.
Ушбу ҳодиса ижтимоий тармоқларда ҳам кенг муҳокамаларга сабаб бўлган. Жумладан, блогерлар ва таниқли шахсларнинг қурилиш компанияларининг молиявий ҳолати, ҳужжатлари ва имкониятларини синчиклаб ўрганмасдан, фақат реклама эвазига уларни тарғиб қилиши оқибатида юзлаб оддий одамлар алданиб ва уйсиз қолаётгани қаттиқ танқид остига олинган.
Изоҳлар мавжуд емас