Ўзбекистон, Тошкент - Batafsil.uz. Ховос тумани Ички ишлар бўлими ходимларининг фуқаронинг хонадонига кириб, унинг турмуш ўртоғини олиб кетишга урингани бўйича ўтказилган хизмат текшируви натижасида 4 нафар ходимга интизомий жазо чоралари қўлланилди. Яна бир ходимнинг хатти-ҳаракатларига якуний баҳо бериш масаласи Интизомий кенгашга ҳавола этилди.
Мазкур ҳолат Олий Мажлиснинг Инсон ҳуқуқлари бўйича вакилига (Омбудсманга) Сирдарё вилоятидан келиб тушган мурожаат асосида ўрганилган. Мурожаатда фуқаро ички ишлар ходимлари унинг хонадонига кириб, турмуш ўртоғини олиб кетишга урингани, бунда ҳаракатларининг сабабини тушунтирмагани ва тегишли ҳужжатларни кўрсатмаганини билдирган.
Мурожаат Омбудсман назоратига олиниб, унинг Сирдарё вилоятидаги минтақавий вакили томонидан ўрганилган. Тўпланган материаллар ички ишлар органлари ходимларининг ҳаракатларига ҳуқуқий баҳо бериш учун Сирдарё вилояти Ички ишлар бошқармасига юборилган.
Хизмат текшируви якунига кўра, Ховос тумани Ички ишлар бўлимининг 4 нафар ходимига хизмат фаолиятида аниқланган камчиликлар юзасидан "ҳайфсан" ва "танбеҳ" интизомий жазолари берилган.
Изоҳлар мавжуд емас