Ўзбекистон, Тошкент - Batafsil.uz. Хоразм вилоятида қаттиқ маиший чиқиндилардан электр энергияси ишлаб чиқариш лойиҳасига 100 миллион доллар тўғридан-тўғри хорижий инвестиция жалб қилиш режалаштирилган. У 2026-2028 йилларда Жанубий Кореянинг Green Hammer компанияси иштирокида амалга оширилади.
Президент қарорига кўра, корхона кунига 800 тоннага яқин чиқиндини термик усулда қайта ишлаб, йилига 71 миллион киловатт соатгача электр энергияси ишлаб чиқариш қувватига эга бўлади. Қурилиш учун Урганч туманидаги «Янги Ўрғонбоқ» маҳалласидан 15 гектар ер ажратиш режалаштирилган.
Станция ишга туширилгандан сўнг, «Green Hammer» компанияси ишлаб чиқарилган электр энергиясини 30 йил давомида «Ўзенергосотиш»га кафолатли сотади, Чиқиндиларни бошқариш агентлиги эса худди шу муддат давомида корхонани зарур миқдордаги қаттиқ маиший чиқиндилар билан таъминлаш мажбуриятини олади.
Лойиҳа компанияси қурилиш даврида 7 миллион долларлик банк кафолатини тақдим этиши керак. Шунингдек, инвестор станцияни ягона энергия тизимига улаш учун зарур электр узатиш линиялари ва бошқа инфратузилмани қуради.
Аввалроқ Ўзбекистонда чиқиндилардан электр энергияси ишлаб чиқариш бўйича умумий қиймати 933 миллион долларлик олтита лойиҳа амалга оширилаётгани хабар қилинганди. Корхоналар ишга тушгач, йилига 3,6 миллион тонна чиқиндини қайта ишлаб, 1,6 миллиард киловатт соат электр энергияси ишлаб чиқариш қувватига эга бўлади.
Изоҳлар мавжуд емас