Терма жамоанинг Конго ДР га қарши кечган ва 1:3 ҳисобидаги мағлубият билан тугаган сўнгги учрашувидан сўнг, Алишер Қодиров ўзининг ижтимоий тармоқдаги саҳифасида кескин танқидий фикр қолдирган эди. Унда сиёсатчи мусобақадаги натижаларни паст баҳолаб, қуйидагича ёзганди:
"0 — мураббийнинг иши, дарвозабон, жамоавий руҳ, тўпланган очколар, миллиардларга сотиб олинган қиймат ва келажакка бўлган умид..."
Шунингдек, футболчиларни "ҳарф танимайдиган биринчи синф ўқувчиси"га ўхшатиш орқали Қодиров мухлисларнинг айни ўша дақиқадаги кучли алами ва ғазаби ортидан сиёсий очко йиғишга урингандек таассурот қолдиргани. Бу баёнот тарихда илк бор бизни мундиалга олиб чиққан йигитларнинг меҳнатига нисбатан жуда кескин ва ҳиссиётларга берилган баҳо эди.
Орадан ҳеч қанча вақт ўтмай, терма жамоа Ватанга қайтадиган куни Алишер Қодировнинг муносабати 180 даражага ўзгарган. Кечагина умидсизликка "ноль" баҳо қўйган сиёсатчи, бугун тўсатдан мамлакатнинг Ялпи ички маҳсулот (ЯИМ) статистикасини ўртага суриб, мағлубиятдан матонат қидиришга ўтган.
Энди унинг назарида футболчилар "миллиардлик муваффақиятсизлик" эмас, балки "мундиал оиласига олиб кирган қаҳрамонлар"га айланди:
"Биз сизлар билан ғурурланамиз... Мағлубият пайтида атрофда бирлаша олиш ҳам бизнинг халқимизга хос бўлган хусус xусусият. Менинг ишончим комил, бутун халқимиз, футбол мухлислари бугун мана шу жамоа атрофида бирлашади".
Сиёсатчининг бу икки чиқиши ўртасидаги мантиқсизлик жамоатчилик кўзидан яширин қолгани йўқ: Агар кеча умидлар ва жамоавий руҳ "ноль" бўлган бўлса, бугун қайси асос билан улардан фахрланиш мумкин? Қисқа муддатда жамоанинг ички муҳити ёки кўрсатган натижаси тубдан ўзгариб қолмаган-ку.
Мухлисларни бирлашишга чақиришдан аввал, нега олдинроқ ўзи биринчилардан бўлиб тош отган? Мағлубият пайтида жамоани ёлғиз қолдирмасликни ваъз қилаётган раҳбарнинг ўзи бир футболчиларни омма олдида аёвсиз қоралаган эди.
Бу вазият Алишер Қодировнинг жамоатчиликдаги умумий кайфиятга қараб тез мослашувчи сиёсат юритишини яна бир бор кўрсатган. Терма жамоа ютқазганда — халқнинг аламидан фойдаланиб "ноль" қўйиш, йигитлар юртга қайтиб келиб, уларни қўллаб-қувватлаш тўлқини бошланганда эса — биринчилардан бўлиб "биз сиз билан фахрланамиз" деб минбарга чиқиш сиёсий масъулият мезонларига тўғри келмайди.
Бугунги мухлислар ижтимоий тармоқлардаги архивларни яхши эслашади. Футболчиларимиз ҳақиқатан ҳам катта ҳажмдаги меҳнатни амалга оширишди, улар соғлом танқидга ҳам, чин дилдан қўлловга ҳам лойиқ. Бироқ бу жараён сиёсатчиларнинг кунлик кайфиятига қараб ўзгарадиган арзон поппулизм қуролига айланмаслиги керак.
Изоҳлар мавжуд емас