Ўзбекистон, Тошкент - Batafsil.uz. Канаданинг Ванкувер шаҳрида бўлиб ўтган FIFA Congress якуни кескин сиёсий можаро билан якунланди. Анжуман сўнгги қисмида Джанни Инфантино рамзий ярашув ташаббуси билан Фаластин футбол ассоциацияси ва Исроил футбол ассоциацияси раҳбарларини саҳнага таклиф қилди. У томонларни қўл бериб кўришишга чақирган бўлса-да, бу ташаббус кутилган натижани бермади.
Фаластин футбол федерацияси раҳбари Джибриль Ражуб мазкур таклифни очиқ рад этди. У Исроил вакили билан қўл бериб кўришишдан бош тортиб, ўз позициясини кескин сиёсий баёнот билан изоҳлаган. Ражуб нутқида буни "геноцидни амалга ошираётган ҳукумат вакили билан мулоқот қилмаслик" деб таърифлаб, Фаластин халқи оғир аҳволда эканини таъкидлаган.
Шу билан бирга, у Фаластин томони Спорт бўйича ҳакамлик судига расмий мурожаат киритганини маълум қилди. Даъвода Исроил терма жамоалари ва клубларининг халқаро мусобақаларда иштирокини чеклаш масаласи кўтарилган.
Мазкур кескин ҳолатдан олдин Джанни Инфантино конгресс иштирокчиларига ФИФАнинг FIFA Forward дастури доирасидаги инвестициялари рекорд даражага етгани, глобал футбол лойиҳалари ҳажми эса бир неча баробарга ошгани ҳақида ҳисобот берган эди. Бироқ якунда юз берган ушбу сиёсий тортишув халқаро спорт майдонидаги зиддиятлар қанчалик чуқур эканини яна бир бор намоён қилган.
Кузатувчилар фикрича, мазкур воқеа FIFAнинг сиёсий бетарафлик тамойилига амал қилиш имкониятлари ҳамда келгусида халқаро мусобақаларга сиёсий омиллар таъсири қай даражада бўлиши мумкинлиги ҳақида жиддий саволларни кун тартибига олиб чиққан.
Эслатиб ўтамиз, олдинроқ футбол бўйича 2026 йилги жаҳон чемпионати гуруҳ босқичида Ўзбекистон терма жамоасига рақиблик қиладиган сўнгги жамоа номи маълум бўлганди. Қитъалараро плей-офф босқичида Ямайкани 1:0 ҳисобида мағлуб этган Конго Демократик Республикаси вакилларимиз билан бир гуруҳдан жой олган эди.
Изоҳлар мавжуд емас