Ўзбекистон, Тошкент - Batafsil.uz. АҚШ Молия вазирлиги жорий йилнинг июнь ойидан бошлаб доллар купюраларида президент Дональд Трампнинг имзоси туширилган янги дизайндаги пуллар чоп этилишини маълум қилди. Бу Америка мустақиллигининг 250 йиллигига бағишланган тарихий ўзгариш ҳисобланади.
Янги тартибга кўра, АҚШ валютасида 1861 йилдан бери амал қилиб келаётган 165 йиллик анъана ўзгаради. Илгари банкноталарда Ғазначи (Treasurer) ва Молия вазирининг имзолари бўлган бўлса, эндиликда илк бор амалдаги президентнинг имзоси Ғазначи имзоси ўрнини эгаллайди.
Дастлаб Трамп ва Молия вазири Скотт Бессентнинг имзоси туширилган 100 долларлик банкноталар муомалага чиқарилади. Кейинчалик бошқа номиналдаги пуллар ҳам босқичма-босқич янгиланади. Молия вазири Скотт Бессент ўз баёнотида бу қарорни АҚШ мустақиллигининг 250 йиллик тўйи (Semiquincentennial) учун муносиб воқеа эканлигини таъкидлаган.
Қайд этиш жоизки, АҚШ қонунчилиги тирик шахсларнинг портретини пулларда тасвирлашни тақиқлайди, бироқ банкноталардаги имзоларни ўзгартириш Молия вазирлигининг ваколатига киради. Шу сабабли долларнинг умумий дизайни ва ундаги тарихий шахслар портрети ўзгаришсиз қолади. Янги имзоли пуллар июнь ойидан бошлаб банклар орқали муомалага кириши кутилмоқда.
Аввалроқ Тасвирий санъат бўйича федерал комиссия АҚШ президенти Дональд Трамп тасвири туширилган эсдалик олтин тангаси дизайнини бир овоздан маъқуллагани ҳақида хабар берган эдик. Соф 24 каратли олтиндан ясалган бу тангани 4 июль куни нишонланадиган мамлакат мустақиллигининг 250 йиллиги муносабати билан чиқариш режалаштирилган. Унда Трамп муштларини столга тираб турган ҳолда тасвирланган.
Изоҳлар мавжуд емас