Ўзбекистон, Тошкент - Batafsil.uz. 7 сентябрь куни Туркиянинг Анталия ва Адана вилоятларида бир нечта ўрмон ёнғинлари содир бўлди. Ёнғинларни бартараф этиш учун ҳаводан ва ердан махсус техника ва қутқарувчилар жалб этилган.
Хорижий агентликнинг хабар беришича, Анталиянинг Серик туманидаги Денизтепеси ва Сариабали маҳаллаларида чиққан ёнғин оқибатида айрим уйлар эвакуация қилинган, бешта хонадон ва бир нечта иссиқхона зарарланган.
Ёнғин чиққан уйда бўлган уч киши тутундан заҳарланиб, шифохонага ётқизилган. Шунингдек, ёнғинни ўчириш ишларига жалб қилинган хусусий компанияга тегишли экскаватор жарликка ағдарилиб кетиши оқибатида унинг ҳайдовчиси ҳам жароҳат олган.
Серикдаги ёнғин 12 та ёнғин ўчириш машинаси, 4 та ўт ўчириш автомобили ва 6 та сув ташувчи техника ёрдамида бартараф этилди. Ҳозирда ҳудудда совитиш ишлари олиб борилмоқда.
Шу билан бирга, Анталиянинг Аксу ва Кепез туманларида ҳам ўрмон ёнғинлари давом этмоқда. Караёз маҳалласи яқинида бошланган олов шамол таъсирида кенг ҳудудга тарқалиб, Кепез туманига ҳам ўтган.
Ёнғинни ўчириш ишларига 5 та самолёт, 10 дан ортиқ вертолёт, 110 та ёнғин ўчириш машинаси ва 600 дан зиёд ходим жалб этилган. Айрим йўллар хавфсизлик чоралари доирасида вақтинча ёпилган.
Адана вилоятининг Козан туманидаги Доганалани маҳалласида ҳам ўрмон ёнғини чиққан. Унга қарши ҳаводан ва ердан кураш олиб борилмоқда. Ёнғиннинг келиб чиқиш сабаби ҳозирча аниқланмаган.
Изоҳлар мавжуд емас